Komandu CT ho DCP Ensera Treinamentu Operasional

Sexta Feira 27 Marsu 2026

(𝐌𝐞𝐝𝐢𝐚 𝐂𝐓) Komandu Componente Terrestre ho Defence Cooperation Program (DCP) husi nasaun Australia ensera treinamentu Operasional iha Baze CT Baucau.

Iha diskursu reprezentante Adido Defeza Australia, Tenente Coronel Philip Butt, hateten treinamentu ne'e kontinua hametin kooperasaun entre Austrália no Timor-Leste iha area Defeza.

“Ami iha nafatin kompromisu atu hatán ba Timor-Leste nia prioridade sira no servisu hamutuk iha parseria ida ne'ebé real no forte liu.”

Tenente Coronel Philip Butt subliña, importánsia husi relasaun sira hodi garante susesu kontínuu husi parseria iha dezenvolvimentu kapasidade nomos kontinua fo kusru treinamentu ba militar sira.

"Kursu ne'e sai hanesan ezemplu ida kona-ba saida maka bele atinji bainhira ita serbisu hamutuk iha parseria real e forte, no iha hau nia pozisaun privilejiadu nudar asistente Adidu Defeza Austrália nian mai nasaun neebe furak hanesan Timor Leste, ha'u hein atu fila fali ba serimónia no atividade formasaun barak liután iha futuru", nia hatutan.

Iha fatin hanesan Komandante Componente Terrestre Coronel Operasaun Espesiais, Domingos da Costa Soares “DOBU” agradese ba DCP tanba liu husi programa ne'e bele eleva tan kapasidade militar sira nian.

Treinamentu refere realiza durante semana haat, iha ne'ebé hetan partispasaun husi militar F-FDTL CT.

𝐄𝐤𝐢𝐩𝐚 𝐌𝐞𝐝𝐢𝐚 𝐂𝐓