Autoridade Baucau Konsidera Marsa Popular hodi Lembra Sakrifísiu FALINTIL nian Durante Tinan-50

Baucau 18 Agostu 2025

(Média F-FDTL) FALINTIL-Forsa Defeza Timor-Leste (F-FDTL), Hamutuk ho Autoridade Munisípiu Baucau veteranus, joventude no estudante inklui komunidade sira komemora loron nasionál Forsa Armada Libertasaun Nasionál Timor-Leste (FALINTIL) ba dala-50 ho tema "Estender a Paz Ao Mundo" iha serimónia, importante ne'e prezide husi Ministra Sosiliedariedade Sosial no Inkluzaun (MSSI) Veronica das Dores.

Iha komemorasaun loron FALINTIL ne'e ho atividade marsa popular la'o ain hahú husi Saudozu Sahe nia moris fatin sede suku Bucoli iha oras 04 Madrugada no to'o iha edifísiu Administrasaun Munisípiu Baucau oras 09 ho balu hodi komemora kedas loron FALINTIL ba Dala-50 iha resintu Administrasaun Munisípiu Baucau.

Hafoin Marsa la'o Ain Sekretaria Munisípal Baucau Asunto Sosial Organizasaun, Maria Celestina Viegas esplika katak, relasiona ho loron FALINTIL Autoridade Munisípiu hamutuk ho F-FDTL hala'o atividade lubuk ida hodi fó onra ba loron importante ne'e.

"Ohin ita hotu hamutuk hodi komemora loron FALINTIL 20 Agostu 1975-2025 Ita hotu hatene katak, ita-nia saudozu boot iha Munisípiu Baucau mak ita-nia aman Vicente Sahe, tanba ne'e mak ita marsa hahú husi Fatin ida ne'e atu nafatin fó ita-nia respeita ba saudozu Sahe no mós saudozu sira seluk"

iha parte seluk Sekretariu Consellu Veteranus, Munisípiu Baucau, Manuel da Costa Soares, hatutan, loron FALINTIL nu'udar momentu importante ida hodi hanoin hikas asuwain sira ne'ebé uluk luta no sira mós uluk halo marsa husi ponta Leste ba rai klaran.

"Ita hanesan la'ó tuir FALINTIL sira nia ain Fatin ita fo mensagem ba ema hotu atu respeitu loron ne'e, Ita la senti kolen, maibé ita senti kontenti hodi husik hela ba ita-nia jerasaun sira komemora loron ne'e importante ba asuwain sira Tan ne'e tenki ka'er metin nafatin kultura ne'ebé uluk kuda tiha ona husi FALINTIL nia laran", nia dehan.

Iha serimónia estandarte bandeira nasionál RDTL ne'e, partisipa husi membru F-FDTL, PNTL, Seguransa Sivil, Bombeiros, Estudante sira nomós eskuteiro sira prense mós ho aktividade sira hanesan aprezentasaun teatru, dansa kultura, nomós atividade sa'e bua nomós dada-tali ne’ebé organiza husi Autoridade Munisípiu Baucau hamutuk ho FALINTL-FDTL no apoiu hosi Autoridade Seguransa no Veteranus sira.

Média-F-FDTL

J'Silva