MD Entrega Armamentu ho Kareta Izuzu bá FALINTIL-FDTL
MD Entrega Armamentu ho Kareta Izuzu bá FALINTIL-FDTL
Kuartel Jenerál, 29 Jullu 2024
Governu liu husi Ministériu Defeza, entrega viatura nomós armamentus bá Komandu FALINTIL-Forsa Defeza Timor-Leste.
"Ohin ita iha oportunidade ida para entrega transporte viaturas, transporte de tatika pesoal nunee mós armamentus ne’ebé Mak hola parte akizasaun tinan kotuk nian liu liu akizoens hirak ne’e hotu iha enkuadramentu lei programasaun Militár," dehan Ministru Defeza Contra Almirante Donaciano Costa Gomes hafoin entrega ekipamentus bá FALINTIL-FDTL, iha Kuartel Jenerál, Fatuhada.
Nia dehan lei de programasaun militár mak lei ida ne’ebé mak sai iha tinan kotuk kedas Komesa implementa i husi implementasaun ne’e mak rezulta akizasoens de viatura balu ne’ebé mak ohin entrega kareta izuzu 8 no armamentu ho kuantidade ne’ebé mak solisitadu ou rekizitadu halo mós entrega ohin.
Nia hatete tipus de armamentu ne’ebé mak mais kompleksu no kompletu i armamentu sira ne’e hotu para atu bele kumpri organika material ne’ebé mak eziste i nunee mós armamentus sira ne’e hotu para bele koresponde ho misoens espesifiku ou misoens espesiais ne’ebé mak Forsas Armadas dezempenha karik armamentu sira ne’e iha kondisoens para atu bele koresponde.
Governante ne’e hatete husi lei programasaun militár ne’e, lei ida ne’ebé mak permite atu oinsá mak forsas armadas bele dezenvolve, dezenvolve iha nia meius, armamentu, ekipamentus no rekursu hotu hotu ne’ebé mak nesesariu para atu transforma husi forsa ida ne’ebé mak kik operasional, proposional tuir konseitu estratejiku militár ne’ebé mak define.
Nia hatete kareta sira ne’e mai husi Tailandia mais akizoens hirak ne’e hotu halo komforme rekezitus operasionais.
"Tuir implementasaun de primeira faze lei da programasaun ita gasta hamutuk 9 milhões, la’os deit hola meius transporte tatiku pesoal i armamentu deit maibé hola mós meius maritimu hanesan meius navais militares sira iha Komponente Naval sira utiliza, meius balu hola parte husi akizasaun ne’ebé mak enkuadra iha lei programasaun militár nian.
Iha fatin hanesan Xefe Estadu Maior F-FDTL Brigadeiro Jenerál José da Costa Soares "Trix" hatete, ekipamentus sira ne’e FALINTIL-FDTL sei hare oinsá utiliza meius sira ne’e bele kumpri misaun ne’ebé politiku sira fó bá Forsas Armadas.
"Ekipamentus sira ne’e utiliza bá FALINTIL-FDTL tomak, ida ne’e faz parte lei programasaun militár ne’ebé uluk kedas forsa ne’e iha prinsipiu ida dehan neneik maibé bebeik, la’os ohin koalia atu sosa kedas maibé depende mós orsamentu tinan tinan, iha ita sosa, ne’e mak F-FDTL nia lia fuan ida dehan neneik maibé bebeik,"nia konklui.
Media F-FDTL
