Xefe Estadu Maior Jenerál F-FDTL Reprezenta Ministru Defeza Partisipa Iha Enkontru Ministru Defeza ASEAN Nian Bá Dala XX Iha Filipina

Filipina, 27–29 Outubru 2026

Xefe Estadu Maior Jenerál FALINTIL-Forsa Defeza Timor-Leste (F-FDTL), Tenente Jenerál Domingos Raul “Falur Rate Laek”, reprezenta Sua Excelénsia Ministru Defeza TL, Donaciano da Costa Gomes “Pedro Klamar Fuik”, PhD, hodi partisipa iha Enkontru Ministru Defeza ASEAN nian bá dala XX, ne’ebé hala’o iha Sidade Lapu-Lapu, Cebu, Filipina.

Enkontru ne’e hala’o iha Nasaun Filipina no Marka prejenza mos Prezidente ba ASEAN Defence Ministers’ Meeting (ADMM) no ADMM-Plus, ne’ebé lidera husi Sekretáriu Defeza Filipina, Sr. Gilberto Teodoro Jr.

Enkontru Ministru Defeza ASEAN bá dala XX ne’e sai nu’udar momentu importante ida, liu-liu tanba tinan 20 liubá mak ADMM hala’o enkontru dahuluk, no agora kontinua hametin kooperasaun defeza rejionál hodi prepara dalan ba kooperasaun iha futuru.

Enkontru ne’e mós partisipa husi Sekretáriu-Jerál ASEAN, Dr. Kao Kim Hourn, hamutuk ho reprezentante sira husi Nasaun membru ASEAN no parseiru sira.

Atividade ne’e hala’o durante loron tolu, hahu husi 27 to’o 29 Outubru 2026. Iha loron dahuluk, hala’o mós Enkontru Informál Ministru Defeza (Defense Ministers’ Informal Meeting – DMIM), ne’ebé envolve Sekretáriu ba Guerra Estadus Unidus Amérika (EUA), Pete Hegseth, no Ministru Defeza Japaun, Koizumi Shinjiro.

Enkontru informál ne’e foka liu ba dezafiu sira ne’ebé rejiaun Indo-Pasífiku hasoru, no mós perspetiva ba kooperasaun defeza iha futuru entre ASEAN, Estadus Unidus Amérika no Japaun.

Média F-FDTL