Komandu F-FDTL Enserra Treinamentu Manutensaun No Kapasitasaun Militár Feminina

Baucau, 28 Agostu 2026 

Komandu FALINTIL-Forsa Defeza Timor-Leste (F-FDTL), hamutuk ho Defence Cooperation Program (DCP) Australia no Nova Zelandia, enserra treinamentu manutensaun no kapasitasaun ba militár feminina, ne’ebé hala’o durante semana neen iha Centro Treinamentu (CT), Baucau.

Iha okaziaun enseramentu, Adidu Defeza Australia hato’o parabéns ba soldadu, sargentu no ofisiál sira ne’ebé partisipa iha treinamentu durante semana neen. Nia apresia servisu no dedikasaun husi partisipante sira, ne’ebé liu husi treinamentu ne’e aumenta koñesimentu no kapasidade, liuliu iha área operasionál.

Nia mós enkoraja militár sira atu kontinua aplika koñesimentu no abilidade ne’ebé hetan durante treinamentu, no reprezenta F-FDTL ho orgullu, profisionalizmu no disiplina.

“Lori naran Australia, ha’u hakarak hato’o parabéns ba imi hotu. Ha’u haksolok tebes haree Timor-Leste, Australia no Nova Zelandia servisu hamutuk atu prepara ba operasaun sira iha futuru,” hatete Adidu Defeza Australia.

Iha parte seluk, Komandante Componente Terrestre, Koronel Infantaria Operasaun Espesiál Domingos da Costa Soares “DOBU”, hatete katak enseramentu ne’e marka remata treinamentu ne’ebé hala’o durante semana neen, ho objetivu atu hasa’e kapasidade no dezenvolve koñesimentu militár sira iha área tátika no operasionál.

Nia subliña katak partisipasaun militár feminina iha treinamentu ne’e hatudu vontade, dedikasaun no kompromisu atu dezenvolve kapasidade iha área operasionál. Ida-ne’e mós hatudu katak militár feminina la’ós de’it atu hala’o servisu administrativa, maibé iha preparasaun fizika no kapasidade atu hala’o knaar iha área operasionál.

“Treinamentu manutensaun no kapasitasaun la’ós de’it atu hasa’e kapasidade fizika no operasionál, maibé mós fó inspirasaun ba militár feminina atu kontinua hatudu korajen, disiplina no determinasaun iha servisu ba instituisaun,” nia hatete.

Komandante Komponente Terrestre mós apela ba militár feminina atu sai parte importante iha lideransa no operasaun militár, hamutuk ho militár mane, hodi kontribui ba defeza no seguransa nasaun.

Nia afirma katak igualdade jéneru iha servisu militár la’ós de’it prinsipiu, maibé tenke sai prátika real. Tamba ne’e, F-FDTL kontinua implementa politika, diretiva no planu asaun nasionál kona-ba Feto, Páz no Seguransa, liu husi atividade sira ne’ebé fó oportunidade no empodera militár feminina, hodi promove instituisaun ne’ebé inkluziva.

Treinamentu ne’e envolve militár feminina hamutuk na’in-40, kompostu husi Komponente Terrestre, Componente Naval no Forsa Apoio Jeral (FAG).

Instrutór sira mai husi Forsa Australia no Nova Zelandia, hamutuk ho instrutór husi Centro Instrução Comandante Nicolau Lobato (CICNL), Metinaro, no instrutór husi Componente Terrestre, hamutuk na’in-27.

Treinamentu ne’e hala’o durante semana neen, hahú husi loron 21 Jullu 2026 no remata iha loron 28 Agostu 2026.

Iha serimónia enseramentu ne’e, partisipa mós reprezentante Embaixadora Nova Zelandia, Adidu Defeza Australia, Asesor Portugal, reprezentante Componente Naval, Komandante FAG, Komandante CICNL, Komandante Apoio Servisu, Komandante Unidade Polisia Militar (PM), Komandante Unidade Unidade Forsa (UF), Responsável Jéneru F-FDTL, instrutór sira, ofisiál, sargentu no prasa sira.

Media F-FDTL

Alf Pio, Sold. Sarmento & Francisco