F-FDTL Partisipa Iha Audiénsia Públika OJE 2027 Hodi Hato’o Prioridade No Nesésidade Orsamentál Iha Área Defeza No Seguransa

Parlamentu Nasionál, 26 Outubru 2026 

Komandu FALINTIL-Forsa Defeza Timor-Leste (F-FDTL), liuhusi Adjuntu Xefe Estadu-Maior F-FDTL, Koronel Tirosinado Mário Baptista “Bersama”, hamutuk ho Divizaun Planeamentu no Divizaun Finansa, partisipa iha Audiénsia Públika kona-ba Orsamentu Jerál Estadu (OJE) 2027, ne’ebé organiza husi Komisaun B Parlamentu Nasionál.

Audiénsia ne’e nia objetivu mak atu aprezenta, analiza no diskute prioridade, nesesidade no proposta orsamentál ba tinan fiskál 2027, liuliu iha área defeza no seguransa nasionál.

Iha atividade ne’e, partisipa mós reprezentante husi Ministériu Defeza (MD) no instituisaun sira iha nia tutela, inklui Institutu Defeza Nasionál (IDN) no Autoridade Marítima Nasionál. Partisipasaun instituisaun sira-ne’e sai hanesan oportunidade atu hato’o prioridade setoriál no nesesidade orsamentál ba deputadu Parlamentu Nasionál.

Durante audiénsia públika, Ministériu Defeza, F-FDTL no instituisaun tuteladu sira iha oportunidade atu aprezenta no esplika programa, atividade no planu dezenvolvimentu institusionál ne’ebé planeia atu implementa iha tinan 2027. Asuntu importante sira ne’ebé diskute inklui nesesidade rekursu finanseiru no umanu, dezenvolvimentu rekursu umanu, formasaun no kapasitasaun pesoál, peskiza, no esforsu atu hametin kapasidade institusionál iha área defeza nasionál.

Ba F-FDTL, planeamentu no diskusaun orsamentál sai nu’udar etapa importante atu asegura katak programa no atividade sira bele hala’o tuir prioridade institusionál, ho apoiu rekursu ne’ebé adekuadu. Alokasaun orsamentu ne’ebé planeia ho di’ak bele kontribui ba dezenvolvimentu kapasidade institusionál, hadi’a prontidaun operasionál no profisionalizmu membru F-FDTL, atu hala’o misaun defeza soberania no integridade territóriu nasionál, tuir mandatu ne’ebé define iha lei.

Iha prosesu ne’e, prioridade no nesesidade orsamentál presiza konsidera objetivu estratéjiku, kapasidade ezekusaun programa no utilizasaun rekursu públiku ho efisiénsia. Transparénsia, responsabilidade no prestasaun kontas mós sai nu’udar prinsipiu importante atu asegura jestaun orsamentál ne’ebé di’ak, responsavel no orientadu ba rezultadu.

Audiénsia Públika kona-ba OJE 2027 ne’e mós sai hanesan plataforma importante ba instituisaun sira atu hato’o proposta no nesesidade setoriál ba deputadu Parlamentu Nasionál, atu prosesu avaliasaun no deliberasaun orsamentál bele konsidera nesesidade real no prioridade dezenvolvimentu nasionál.

Partisipasaun F-FDTL hamutuk ho Ministériu Defeza no instituisaun tuteladu sira reflete kompromisu atu kontinua hametin kooperasaun institusionál ho Parlamentu Nasionál iha prosesu planeamentu no elaborasaun orsamentu estadu, hodi apoia dezenvolvimentu kapasidade defeza nasionál no manutensaun soberania, independénsia no integridade territóriu Repúblika Demokrátika Timor-Leste.

Média F-FDTL