F-FDTL Simu Konfiansa No Sai Uma Nain Ezersísiu FELINO Iha 2027

Foz do Iguaçu, Paraná, Brasil, 20 Agostu 2026

Komandu FALINTIL-Força Defeza Timor-Leste (F-FDTL) partisipa iha Ezersísiu FELINO 2026, ne’ebé hala’o iha Foz do Iguaçu, Estado do Paraná, Repúblika Federativa Brasil, hosi loron 10 to’o 20 Agostu 2026.

Delegasaun F-FDTL lidera husi Koronel Tirocinado Mário Baptista “Bersama”, nu’udar Xefe da Delegasaun, ne’ebé reprezenta Xefe Estadu Maior Jenerál F-FDTL, Tenente-General Domingos Raúl “Falur Rate Laek”, atu partisipa iha atividade ne’e hamutuk ho CEMGFA sira husi nasaun membru Comunidade dos Países de Língua Portuguesa (CPLP).

Ezersísiu FELINO 2026 ho tema “Com Forças no Terreno”, ho objetivu atu hametin kooperasaun, koordinasaun no interoperabilidade entre forsa armada husi nasaun sira membru CPLP, liuliu iha área operasaun konjunta no preparasaun militar.

Enseramentu Ezersísiu FELINO 2026 hala’o iha loron 20 Agostu 2026. Iha serimónia enseramentu, CEMGFA Brasil entrega Bandeira CPLP ba Coronel Tirocinado Mário Baptista “Bersama”, nu’udar símbolu transferénsia responsabilidade ba Timor-Leste, tanba iha tinan 2027, Timor-Leste sei sai uma-na’in ba Ezersísiu FELINO CPLP.

Entrega Bandeira CPLP ne’e sai símbolu importante ba Timor-Leste, tanba hatudu konfiansa no responsabilidade ne’ebé sei fó ba Timor-Leste atu prepara no hala’o Ezersísiu FELINO iha tinan oin mai.

Média F-FDTL