NRDTL Jaco Fila Fali Ba Operasaun, XEMGFA Bolu Governu Harii Kapasidade Marítima Nasionál

Behau, 07 Agosto 2026

Xefe Estadu Maior Jenerál F-FDTL Tenente Jenerál Domingos Raul "Falur Rate Laek", ohin ofisialmente relansa ró patrulla NRDTL Jaco iha Doka Behau, hafoin remata prosesu manutensaun ne'ebé halo ró ne'e para operasaun durante tempu naruk.

Iha ninia intervensaun, Xefe Estadu Maior Jeneral F-FDTL hato'o apresiasaun ba IX Governu Konstitusionál, liu husi Ministru Defeza, ba kompromisu no esforsu atu halo NRDTL Jaco fila ba servisu. Tuir nia, prezensa ró patrulla iha tasi importante tebes atu asegura soberania, monitoriza área marítima no proteje interese nasionál.

Nia hateten katak Timor-Leste hasoru dezafiu hanesan peska ilegál, tráfiku no komérsiu ilísitu, ne'ebé presiza kapasidade naval ne'ebé forte no permanente. Tanba ne'e, nia subliña katak Komponente Naval iha papél importante atu suporta dezenvolvimentu ekonomia azul no proteje rekursu tasi ba jerasaun sira tuir mai.

XEMGFA mós halo apelu ba Governu atu kontinua investe ho efisiénsia iha setor defeza no seguransa, evita investimentu repetitivu, no konsolida doutrina uzu hamutuk entre instituisaun sira.

Atualmente, NRDTL Jaco fila ona ba operasaun normal, no lakleur tan NRDTL Betano mos sei prontu. Tan ne'e, XEMGFA husu Governu atu garante manutensaun regulár ba ró sira no konsidera sosa tan ró patrulla oseánika (OPV) ida atu reforsa kapasidade monitorizasaun Zona Ekonómika Eskluziva Timor-Leste.

Iha remata, XEMGFA agradese ba Mariña Portugál no Governu Austrália ba apoiu kontinuu iha dezenvolvimentu Komponente Naval F-FDTL, liu husi apoiu tékniku no formasaun rekursus umanus.

Nia mos bolu ba tripulasaun naval sira atu tau matan di'ak ba NRDTL Jaco, tanba manutensaun di'ak ba ró signifika soberania nasionál ne'ebé metin no preparadu atu defende interese Timor-Leste iha tasi.

Ekipa Média F-FDTL

Sargento Carceres/Cabo J' Silva