DSM F-FDTL Hamutuk Ho Sentru Saúde Aileu Vila Halo Tratamentu Saúde Ba Komunidade Sira Iha Suku Seloi Kraik

Aileu, Seloi-Kraik, 29 Outubru 2026

FALINTIL-Forsa Defeza Timor-Leste (F-FDTL), liuhusi Diresaun Saúde Militar (DSM), hamutuk ho ekipa médiku husi sentru Saúde Munisípiu Aileu vila, hala’o atividade atendimentu no tratamentu saúde ba komunidade hamutuk na’in 215 iha Suku Seloi-Kraik, Munisípiu Aileu.

Atividade atendimentu saúde ne’e hala’o nu’udar parte ida husi kontinuidade Exersísiu Aisirimou, ne’ebé envolve unidade sira iha F-FDTL, hanesan Policia Militár,Fuzileiro no Unidade FALINTIL,durante semana ida iha área juridiku Suku Seloi-Kraik.

Liuhusi atividade ne’e, komunidade hetan oportunidade atu asesu ba atendimentu saúde ne’ebé oferese husi ekipa médiku Diresaun Saúde Militar F-FDTL no sentru Saúde Munisípiu Aileu no Kooperasaun entre saúde militar no saúde sivíl ne’e sai hanesan esforsu hamutuk atu aproxima servisu saúde ba komunidade no fó asisténsia tuir nesesidade saúde ne'ebe iha.

Aleinde atividade atendimentu saúde, Komandu F-FDTL mós halo distribuisaun ekipamentu no materiál eskola no desportu nian, hanesan kadernu, pasta no farda ba joga bola, ba autoridade Suku Seloi-Kraik no reprezentante koordenadór eskola sira iha Suku refere.

Distribuisaun materiál sira ne’e nia objetivu mak atu fó apoiu ba atividade edukasaun no desportu, no mós kontribui ba nesesidade komunidade, liuliu iha área edukasaun no dezenvolvimentu juventude.

Atividade asisténsia saúde no distribuisaun ekipamentu ne’e hatudu kooperasaun entre F-FDTL, autoridade lokál no komunidade iha Suku Seloi-Kraik. Inisiativa hirak-ne’e mós reflete espíritu solidariedade no servisu hamutuk entre FALINTIL-Forsa Defeza Timor-Leste no povu.

Ho lema “FALINTIL mak ikan no Povu mak bee,” atividade ne’e enfatiza relasaun ne’ebé metin entre F-FDTL no povu, ne’ebé presiza hamutuk kontribui ba paz, seguransa no dezenvolvimentu iha komunidade.

Média F-FDTL