Ofisiál Kursu Promosaun Bá Kapitaun F-FDTL Hala'o Ezersísiu “Giro Do Horizonte”

Laleia, 28 Outubru 2026

Ofisiál subalternu na’in-15 husi FALINTIL-Forsa Defeza Timor-Leste (F-FDTL), ne’ebé partisipa hela iha Kursu Promosaun ba Kapitaun (CPC), hala’o ezersísiu kampu “Giro do Horizonte” iha rejiaun Laleia, iha loron 28 Outubru 2026. Atividade ne’e integra iha faze espesiál kursu terrestre nian, iha ámbitu kooperasaun defeza entre Portugál no Timor-Leste.

Ezersísiu ne’e hetan akompañamentu husi asesór portugez no apoiu husi formadór timoroan na’in-rua, ho objetivu atu aplika koñesimentu prátiku kona-ba métodu militár “Giro do Horizonte”, ne’ebé uza hodi identifika no karakteriza terrenu.

Métodu ne’e importante tebes ba preparasaun no transmisaun orden, aprezentasaun planu operasionál sira, no esplika situasaun iha kampaña militár.

Liuhusi atividade ne’e, ofisiál sira hetan oportunidade atu dezenvolve no hametin kompeténsia iha análize terrenu husi perspetiva militár, inklui kapasidade atu aprezenta informasaun kona-ba aspetu prinsipál sira iha estudu situasaun ho maneira klaru, ordenada no sistemátika.

Ezersísiu ne’e nu’udar parte ida husi prosesu formasaun profisionál ba ofisiál F-FDTL, ne’ebé buka atu hasa’e koñesimentu, abilidade no preparasaun operasionál, liuhusi kooperasaun no troka esperiénsia entre Portugál no Timor-Leste.

Média F-FDTL

Alferes Doni Martins