Komandu F-FDTL Oferese Jantar Boas-Vindas Ba Xefe Forsa Defeza Nasionál Tailándia No Delegasaun

Díli, 10 Novembru 2026

Komandu FALINTIL-Forsa Defeza Timor-Leste (F-FDTL), liu husi Xefe Estadu Maior Jenerál F-FDTL, Tenente-Jenerál Domingos Raul “Falur Rate Laek”, hamutuk ho membru sira husi estrutura komandu F-FDTL, oferese jantar boas-vindas (Welcome Dinner) ba Xefe Forsa Defeza Nasionál Tailándia, General Ukris Boontanondha, hamutuk ho nia delegasaun, iha Hotel Novo Turismo, Díli.

Atividade jantar boas-vindas ne'e hala'o nu'udar parte ida husi programa vizita ofisiál Xefe Forsa Defeza Nasionál Tailándia no delegasaun ba Timor-Leste, ho objetivu atu haforsa amizade, hametin relasaun diplomátika no militár, no promove espírito konfraternizasaun entre instituisaun defeza nasaun rua.

Iha biban ne'e, Xefe Estadu Maior Jenerál F-FDTL, Tenente-Jenerál Domingos Raul “Falur Rate Laek”, hato'o boas-vindas no apresiasaun ba vizita ofisiál ne'e, ne'ebé konsidera importante tebes atu kontinua hametin relasaun amizade no kooperasaun entre F-FDTL no Forsa Defeza Nasionál Tailándia.

Kooperasaun bilaterál entre Timor-Leste no Tailándia, liuliu iha área defeza no seguransa, iha papel importante atu dezenvolve kapasidade institusionál, haforsa rekursu umanu no promove partilla esperiénsia entre forsa armada nasaun rua.

Liu husi enkontru no atividade hanesan ne'e, espera katak relasaun kooperasaun entre F-FDTL no Forsa Defeza Nasionál Tailándia sei kontinua dezenvolve no sai forte liután iha futuru, bazeia ba prinsípiu amizade, respeitu mútuu no komprensaun komún.

Jantar boas-vindas ne'e remata ho ambiente amizade no konfraternizasaun, ne'ebé refleta kompromisu hamutuk atu kontinua hametin ligasaun no kooperasaun entre Timor-Leste no Tailándia, liuliu iha setór defeza no seguransa.

Média F-FDTL

Cabo J'Silva