Forsas Armadas Nasaun 5 Partisipa Ezersísiu Hari Hamutuk Iha Timor-Leste
Metinaro, 01 Outubru 2024
Forsas Armadas husi Nasaun 5 partisipa ezersísiu Hari Hamutuk (HH24) bá dala 12 ho objetivu atu hametin liu tan kooperasaun iha area enjiñaria nian, Militár husi Nasaun lima ne’e mak hanesan, Timor- Leste, Estadus Unidus Amerika, Japaun, Austrália no mós Nova Zelândia.
Tuir Xefe Estadu Maior Jenerál FALINTIL-Forsa Defeza Timor-Leste (F-FDTL) Tenente Jenerál Domingos Raúl “Falur Rate Laek” hatete, ezersísiu ida ne’e halo bá dala 12.
"Ezersísiu ida ne’e tuir esperiensia sira Militár F-FDTL hamutuk tan ho País 4, ita nafatin halo ezersísiu ida ne’e hodi troka esperiensia liliu, agradese bá embaixadores sira liliu komunidade Nasaun ha’at, ne’ebé sira mai koopera ho ita, maske ita Nasaun ki’ik maibé sira mak mai projeta ita bá mundu hodi kuñese ita,"dehan Tenente Jenerál Falur Rate Laek hafoin remata abertura Ezersísiu Hari Hamutuk (HH24) iha Unidade Apoiu Servisu (UAS) Metinaru, Dili.
Nia hatete ezersísiu ne’e la’os fó de’it kapasidade no troka esperiensia maibé projeta imajem Timor Leste bá mundu.
Nia dehan atividades ne’ebé mak sei hala’o durante ezersísiu Hari Hamutuk (HH24) mak hanesan atividades konstrusaun, horizontal no vertikal apoiu sira ne’ebé bolu Civil Militár (CIMIC) nian bá hadia eskola iha Hato-Udu Munisípiu Ainaro.
Nia akresenta agora nia parte dezeña hela programa sira no atu husu bá Nasaun parseria sira sei mai fó hanorin agrikultura bá militares sira,"nia konklui.
Iha fatin hanesan Embaixadór Japaun bá Timor Leste Tetsuya Kimiura agradese bá Kooperasaun hodi realiza ezersísiu hari hamutuk ne’e.
"Deseju bom susesu bá imi hotu no ita hein rezultadu ikus husi ezersísiu hari hamutuk ne’e,"dehan nia
Entretantu Embaixadora Austrália bá Timor Leste, Caitlin Wilson mós hatete Austrália ho pais sira seluk apoiu F-FDTL atu hasa’e kapasidade no sira nia kuñesimentu liu tan iha áreas barak liliu iha tekniku enjiñaria nian hodi eleva tan sira kuñesementu.
Media F-FDTL
