DCP Austrália Entrega Fasilidade Klínika Militár Ba Komandu F-FDTL

Metinaru, 31 Jullu 2026

Kooperasaun ne'ebé dura liu tan marka tan pasu ida inportante ida entre Defence Cooperation Program (DCP) Austrália ofisialmente entrega fasilidade klínika militár ba Komandu FALINTIL-Forsa Defeza Timor-Leste (F-FDTL), nu'udar parte husi apoiu no kooperasaun entre Austrália no Timor-Leste iha área defeza, liuliu iha dezenvolvimentu kapasidade no hadi'a servisu saúde militár.

Entrega fasilidade klínika ne'e marka kompromisu kontinuadu husi DCP Austrália atu apoia dezenvolvimentu F-FDTL, liuhosi hadi'a infraestrutura no apoiu ba nesesidade saúde ba membru sira iha instituisaun F-FDTL.

Fasilidade klínika ne'e sei kontribui ba hadi'a asesu ba servisu saúde ba militár sira, no mos suporta prontidaun no bem-estar membru F-FDTL iha hala'o sira-nia kna'ar.

Komandu F-FDTL hato'o apresiasaun ba Governu liu husi Austrália no DCP tanba apoiu no kooperasaun ne'ebé kontinua, ne'ebé konsidera importante ba hametin relasaun bilaterál no kooperasaun iha área defeza entre nasaun rua ne’e nian.

"iha okaziaun entrega klínika XEMJFA hateten Ho sentidu klean ho devér institusionál no estima maka ha'u hato`o intervensaun iha serimónia ida-ne'e ba entrega instalasaun Klínika Militár. Aktu ida-ne’e simboliza tan marku ida ne’ebé labele hamoos iha parseria estratéjiku ne’ebé sólidu no frutuozu entre Timor-Leste no Austrália, ne’ebé ninia apoiu fornese liu husi Programa Kooperasaun Defeza (DCP) kontribui ona iha dalan estruturál hodi hakbiit Forsa Defeza".hateten Xefe Estadu Maior Jenerál F-FDTL Falur Rate Laek iha serimonia entega klinika militar iha CICNL Metinaru Sexta-Feira ne'e.

"Ha’u rekoñese ho agradesimentu ba Senhora Embaixadora Austrália nian ba ninia vizaun no kompromisu diplomátiku hodi hametin ita-nia relasaun bilaterál. Ha’u mós hato’o liafuan apresiasaun espesiál ba Adidu Defeza no Xefe DCP, no mós ba nia ekipa tomak, enjeñeiru militár australianu no espesialista médiku sira, ne’ebé sira-nia rigór tékniku no dedikasaun halo realizasaun infraestrutura ida-ne’e sai posivel".

"Klínika ida-ne'e hatán ba nesesidade urjente. Sei hamriik nu’udar espasu esperansa no dignidade nian, foka liu-liu ba serbí ita-nia veteranu FALINTIL, mane no feto ne’ebé fó buat hotu ba sira-nia rain no ne’ebé ohin loron, iha estatutu rezerva ka reforma, hasoru kondisaun saúde ne’ebé vulneravel ne’ebé ezije kuidadu kontínuu no espesializadu".

"Aleinde hanesan estrutura fízika, emprendimentu ida-ne’e konstitui katalizadór fundamentál ba funsionamentu efetivu Sistema Saúde Militár nian, dudu konsolidasaun Sistema Forsa Nasionál iha ramu hotu-hotu F-FDTL nian. Iha tempu hanesan, sei hametin Sistema Nasionál Saúde no fó asisténsia vitál ba populasaun sira iha situasaun dezastre, liu husi asaun sira Kooperasaun Sivíl-Militár (CIMIC). Ida-ne'e mós sei sai espasu ideál ba ita-nia médiku sira, enfermeiru sira, no espesialista militár sira ne'ebé hetan formasaun iha rai-laran no rai-li'ur atu ezerse no kontinua hadi'a sira-nia abilidade téknika sira".

"Maibé, efikásia tomak husi projetu ida-ne'e presiza asaun ne'ebé koordenadu no lalais. Nune’e ha’u hato’o apelu maka’as ida ba Ministériu Defeza, Ministériu Saúde no autoridade kompetente sira seluk atu koordena esforsu sira hodi permite asinatura Memorandu Entendimentu lalais, nune’e mós aprovasaun ba Estatutu Klínika Militár no nia respetiva sertifikasaun ofisiál ba operasaun".

"Ikus liu, ha'u apela ba sira hotu ne'ebé responsavel no futuru jestór ba instalasaun ida-ne'e atu asegura ho rigorozu ninia prezervasaun no durabilidade, hodi garante inkluzaun ba ninia manutensaun regulár iha planu anuál, Ha’u hafoun gratidaun ba Povu no Governu Austrália ba sira-nia parseria konstante hodi hari'i Timor-Leste ida ne’ebé seguru no reziliente liu".

Partisipa iha serimonia Entrega Fasilidade klínika militár ne'e hanesan Embaixadora Austrália nian iha Timor-Leste,Adidu Defeza Australia,Xefe Programa Kooperasaun Defeza (DCP),Reprezentante no Dirijente husi Ministériu Defeza,Ministériu,Ofisiais Jenerais no Ofisiais Superiores F-FDTL,Ekipa Enjeñaria, Espesialista Médika no Asesór Internasionál sira husi DCP.

Ekipa Média F-FDTL.

Cabo J' Silva