Diskursu S.E Xefe Estadu Maior Jenerál F-FDTL Iha Selebrasaun Aniversáriu Komponente Terrestre Nian Bá Dala-23

1. Exelénsias:

a. Señores Jeneráis Ativu no Reformadu iha F-FDTL;

b. Señora Prezidente Autoridade Minisipiu Baucau ho nia Estrutura tomak;

c. Señores Dirijentes husi Ministériu Defeza;

d. Señores Adidus Defeza no Assessores husi Paízes Kooperantes;

e. Señor Reprezentante Reverendu Bispu Diocese Baucau,

f. Señor Komandante Komponente Terrestre no nia Estrutura tomak;

g. Señores Ofisiais Superiores, Ofisiais Subalternos, Sarjentus no Prasas;

h. Señores Reprezentantes husi PNTL;

i. Señoras no Señores veteranus, konvidadus espesiais sira iha ne'e.

Bom dia ba ita hotu!

Ho sentidu obrigasaun no onra neʼebé kle'an mak ha'u dirije ba ita-boot sira iha biban ida-ne'e, Selebrasaun solene ba tinan ruanulu-resin-tolu Komponente Terrestre F-FDTL nian. Ohin, ita la marka de'it pasajen tempu, maibé ita selebra konsolidasaun pilar fundamentál ida ita-nia soberania no dedikasaun ne'ebe metin husi ita hotu-hotu ne'ebé jura atu defende ita nia Rai-Doben.

Molok atu kontinua, ha'u-nia devér atu hato'o ba ita boot sira katak Sua Exelénsia, Ministru Defeza, nia komunika ona antes ho kompromisu atu hamutuk ho ita iha loron ohin, maibe imperativu Estadu nian iha minutu ikus no inevitavel presiza nia atensaun imediata, neduni labele partisipa selebrasaun loron ohin. Maibé, Senhor Ministru fó ona instrusaun mai ha'u atu hato'o nia parabéns ne'ebé sinseru no nia rekoñesimentu klean ba serbisu exelente ne'ebé hala'o iha ne'e, husi Komandante Komponente Terrestre, ho nia estrutura tomak, по militares hotu ne'ebe servi ho beran tomak.

Caros militares,

Ita-boot sira maka fundasaun ba ita nia arkitetura seguransa nasional. Durante dékada rua no tinan tolu ne'e, ita-boot nia laran-luak, reziliénsia, no profisionalizmu sai hanesan garantia ba estabilidade ne'ebé ita-nia nasaun joven goza. Iha misaun hotu-hotu, patrullamentu hotu-hotu, no aktu servisu hotu-hotu, ita-boot sira enkarna seguransa ne'ebé permite ita-nia povu atu moris iha dame no prosperidade. Ita-boot sira nia kontribuisaun ultrapasa de'it prezensa fiziku; ida-ne'e maka substánsia morál ba ita-nia independénsia.

Maibé, efikásia forsa militár ida nian la'ós de'it iha ninia ekipamentu ka númeru sira, maibé fundamentalmente iha ninia koezaun étika no doutrinál. Tanba ne'e, imperativu atu repete misaun sagradu husi Kadeia Komandu nian. Ierarkia militár la'ós de'it formalidade administrativu deit, maibe ne'e sistema ne'ebé garante dixiplina, orden, no efikásia operasionál. Respeitu kompletu ba kadeia komandu nian maka xave ne'ebé distinge forsa armada profisionál. Liuhusi obediénsia konxiente no lideransa liu husi ezemplu maka ita harii karakteristika ita-nia instituisaun nian.

Iha kontestu ida-ne'e, ita-nia hahalok hasoru sosiedade sivil mak ita-nia rikusoin estratéjiku boot liu. Ita tenke kuda hahalok ne'ebé aseitavel iha sosiedade, orientadu husi integridade no respeitu ba direitus umanus, atu nune'e bele hametin konfiansa no respeitu husi ita-nia povu. Bainhira sosiedade fiar ninia Forsas Armadas, kria lejitimidade morál nesesária ba Estadu no Governu atu investe iha ita-nia modernizasaun. Konfiansa sosiedade nian maka moeda ne'ebé ita "sosa" ba futuru ita-nia instituisaun nian.

Permite ha'u, iha momentu ida-ne'e, atu dirije liafuan mensajem ne'ebe asertivu, ba podér politiku. Soberania nasionál la'ós buat ida prezente ne'ebé maka fó deit; maibe ne'e mak konstrusaun loroloron nian ne'ebé maka presiza rekursus, meius, formasaun, no sustentabilidade. Investimentu iha Forsas Armadas la'ós despeza, maibé hanesan seguru ba perenidade Estadu nian. Atu kumpre tomak misaun sira ne'ebé konsagra iha konstitusaun, defeza ba ita-nia integridade territoriál no apoiu ba populasaun ita presiza rekursu sira ne'ebé proporsionál ho kompleksidade ameasa modernu sira-nian. Nune'e ha'u apela ba vizaun estratéjiku ita-nia desizaun-na'in politiku sira atu kontinua valoriza no hakbi'it F-FDTL.

Ba distintus parseirus bilaterál sira,

Ami nia jornada la lao mesak. Ha'u hakarak hato'o ami-nia agradesimentu kle'an ba ami-nia parseíru internasionál sira ba apoiu tékniku, formasaun, no operasionál. Relasaun internasionál, hanesan relasaun umanu, hetan oskilasaun; dalaruma ita enfrenta momentu diak no momentu konstrangedor balun. Maibé, precizamente ultrapasa vicissitude sira-ne'e maka ita nia parseria hatudu reziliensia. Esperiénsia partilladu sira-ne'e mak hametin ona lasu kooperasaun nian, hodi halo ita aptu liután no koordenadu atu serbisu hamutuk ba pás no estabilidade iha ita nia rejiaun. Ita-boot sira nia prezensa iha ne'e ohin maka sasin ida ba amizade ne'ebé ita kria.

Atu termina,

Ba mane no feto Komponente terrestre: hau husu atu kontinua sai orgullu ba Timor-Leste. Dixiplina sai ita-boot sira nia matadalan no rai-doben mak sai ita-boot sira nia inspirasaun.

Parabéns ba Komponente Terrestre ba Aniversáriu ba dala rua-nulu-resin-tolu!

Viva Componente Terrestre!

Viva F-FDTL!

Viva Timor-Leste!

Obrigado barak ba ita boot sira hotu nia atensaun!

Ekipa Media F-FDTL