Komandu F-FDTL Halo Abertura Ezersísiu COBRA 25 Iha Ainaro

Ainaro, 13 Outubru 2025

Xefe Estadu Maior Jenerál FALINTIL-Forsa Defeza Timor-Leste (F-FDTL) realiza serimónia abertura Ezersísiu Militár COBRA bá tinan 2025 iha Munisípiu Ainaro.

"Ho sentidu responsabilidade bo'ot no orgullu Militár maka hau deklara ofisialmente abertura bá EZERSÍSIU MILITÁR "COBRA" FALINTIL- Forsa Defeza Timor-Leste iha Munisípiu Ainaro,"hatete Xefe Estadu Maior Jenerál FALINTIL-Forsa Defeza Timor-Leste (F-FDTL) Tenente Jenerál Domingos Raúl "Falur Rate Laek" liu husi nia diskursu wanhira hala'o abertura bá Ezersísiu Cobra bá tinan 2025 iha Munisipíu Ainaro.

Nia dehan, Komandu F-FDTL hili Munisípiu Ainaro la'os koinsidensia. Munisípiu ida ne'e reprezenta teatru operasaun nian ho valor estratejiku aas, mak hanesan. Terrenu foho no rai lolon ne'ebé sei koko hotu nia abilidade atu halo manobra iha kondisaun kritiku, no lorredor natural sira ne'ebé presiza domíniu tátiku no koordenasaun entre unidade partisipante.

Nia tenik, pozisaun elevadu sira ne'ebé ideál bá formasaun rekoñesimentu, defeza teritoriál, no operasaun kontrolu area, klima no jeografia ne'ebé hametin reziliensia no adaptabilidade operasionál, rekonesimentu bá Ainaro sai fatin rezisténsia eroika.

"Ohin iha Munisípiu ne'e sai palku atu perfeksiona ita nia prontidaun Militár bá Militár sira hotu, Ezersísiu ida ne'e marka tranzisaun kritiku husi teoria bá prátika. Prinsipiu doutrinariu, tatika, no estratejia sira ne'ebé estuda iha sala formasaun nian agora sei ezekuta iha kondisaun real ne'ebé aprosima realidade operasionál," nia deklara.

Iha fatin hanesan Sekretariadu Autoridade Munisipíu Ainaro, Robertino de Araújo orgolhu tebes, hanesan preveleju ida bá Munisípiu Ainaro tanba permeira ves Komandu FALINTIL-Forsa Defeza Timor-Leste (F-FDTL) liu husi Aktividade Ezersísiu Cobra bá tinan 2025 ne'ebé maka ohin halo abertura iha Munisípiu Ainaro.

"Ita senti orglhu bo'ot no onra teb-tebes tanba foin permeira veis hala'o halo Ezersísiu bá tinan 2025 nian iha Munisípiu Ainaro,"nia afirma.

Entertantu Ezersísiu COBRA ne'e realiza iha Munisìpiu Ainaro ho Durasaun loron 11 husi Ainaro Villa to Postu Hatudu.

Iha Ezersísiu ne'e la'os treinamentu Militár Deit maibé sei halo mós atividade CIMIC Apoiu Sivil Militár hanesan fahe Nesesidade Bazika, Apoiu mós ekipamentus desporto, tratamentu Saúde bá komunidade sira iha Munisípiu Ainaro, halo mós sosialijaun bá estudante sira kona-bá Nasionalizmu no Patriotismo.

Partisipa iha serimónia Abertura Ezersísiu COBRA 25 ne'e mak hanesan, Xefe Estadu Maior Jenerál F-FDTL Tenente Jenerál Falur Rate, Reprejentante PAM Ainaro, Major Jenerál MAUNANA, Ofisiais Superior F-FDTL, PNTL, Adidos Defeza, Autoridade Munisípiu Ainaro tomak, nomós komunidade tomak iha Munisípiu Ainaro.

Ekipa Media F-FDTL