Komandu F-FDTL Ohin Realija Serimónia Promosaun No Juramentu Bandeira Bá Kadete Alunu Nain 4 Ne’ebé Termina Ona Estudu Iha Akademia Militár Indonésia

Kuartel Jenerál, 03 Agosto 2026

Komandu FALINTIL-Forsa Defesa Timor-Leste (F-FDTL) liu husi Xefe Estadu Maior Jenerál F-FDTL Tenente Jenerál Falur Rate Laek, hamutuk ho estrutura tomak no Adido Defesa Indonésia nian iha Timor-Leste ohin ofisialmente hala’o realija serimónia promosaun bá kadete Alunu nain 4 ne’ebé remata ona estudu iha akademia Militár Indinésia.

Iha diskursu Xefe Estadu Maior Jenerál F-FDTL Tenente Jenerál Falur Rate Laek hateten, aproveita mós semana dahuluk fulan Agostu ida ne'e hodi formaliza promosaun kadetes timor oan sira ne'ebé kompleta ho susesu iha Akademia Militár Indonésia (AKMIL) ne'ebé sira nia serimónia graduasaun hala’o iha Jakarta iha loron 22 fulan-Jullu 2026. Sira ne’e mak hanesan timor oan dahuluk ne'ebé frekuenta AKMIL, ho rezultadu ne'ebé diak, nu'udar rezultadu husi kooperasaun militár entre F-FDTL no Tentara Nasionál Indonézia (TNI), no mós kompromisu tekniku-militár ne'ebé sustenta parseria ne’e.

Nia hatutan, serimonia ida ne’e ho objetivu presizamente aliña formasaun ne'ebé hetan iha instituisaun ne'ebá ho kategoria korrespondente iha F-FDTL nian hodi halo promosaun.

"Bá graduadu nain haat, hau oferese liafuan ho méritu rekonesidu bá ita bo’ot sira, Hotu-hotu hetan rezultadu ezemplar no sei kontinua iha tempu badak bá espesializasaun iha sira nia ramu ida-idak. Ita-bo’ot sira nia dedikasaun fó onra bá ami hotu, no fó onra bá farda ne'ebé uza ohin," katak nia.

Nia subliña tan katak, investimentu Rekursu Umanu iha Forsas Armadas sai nafatin primordial "Ita tenke kontinua aproveita apoiu husi ita nia parseiru dezenvolvimentu sira, maibé internalmente, dezenvolve ita nia inisiativa rasik, partikularmente iha kuadru Asaun Uniformizasaun nian ne'ebé reforsa koezaun no identidade institusionál. Hein katak fulan Agostu ida ne'e halo ita unidu, disiplina, no merese memória ne'ebé ita tenke fó onra," nia afirma.

Entretantu kadete Alunu nain 4 ne’ebé halo promosaun bá postu Alferes no Sub Tenente mak hanesan, Sub Tenente Lucas Mau Buti Araújo dos Santos ne’ebé remata iha Akademi Militár Angkatan Laut, no Alferes Keyduli R. Graça de Jesus Carvalho no Alferes Giovanino Fátima dos Santos Alves remata iha Akademi Angkatan Darat no Alferes Experi Jezinho Gomes Raúl, remata iha Akademi Angkatan Udara.

Partisipa iha serimónia ne’e mak hanesan, Xefe Estadu Maior Jenerál F-FDTL Tenente Jenerál Falur Rate Laek, Vise Xefe Estadu Maior Jenerál F-FDTL Major Jenerál Calisto Santos Coliati, Xefe Gabinete MD, Adido Defesa Repúblika Indonésia iha TL, Komandante Komponente no Unidade, Ofisias Superiores, Kapitaun, Ofisiais Subalternus, Sarjentu Prasas nomós Família husi gradu sira.

Ekipa Média F-FDTL

2' Sarg. Carceres/Cabo J' Silva