Komandu FALINTIL-Forsa Defeza Timor-Leste (F-FDTL) Hamutuk Ho Ministériu Defesa Hasa’e Bandeira Nasionál Fulan Jullu 2026

Kuartel Jenerál, 06 Jullu 2026

Komandu FALINTIL-Forsa Defeza Timor-Leste (F-FDTL), hamutuk ho funsionáriu sira husi Ministériu Defeza, Autoridade Marítima Nasionál (AMN) no Institutu Defeza Nasionál (IDN), hala'o serimónia hasa’e Bandeira Nasionál bá inísiu fulan Jullu 2026, iha edifísiu Kuartél Jenerál no Ministériu Defeza, Fatuhada, Díli.

Serimónia ne'e prezide husi Ministru Defeza, Kontra Almirante Donaciano Rosário Gomes “Pedro Klamar Fuik”, Ph.D. Iha nia intervensaun, Ministru Defeza hateten katak serimónia hasa’e Bandeira Nasionál kada fulan nu'udar tradisaun ida ne'ebé nobre no importante tebtebes bá instituisaun sira hotu. Serimónia ida-ne'e mós sai momentu simboliku atu hakruuk bá sakrifísiu povu Timor-Leste nian ne'ebé luta naruk atu alkansa liberdade, independénsia no soberania.

“Ita hamutuk fali iha dader ida-ne'e atu kumpri tradisaun ida ne'ebé nobre no importante tebtebes bá servidores no instituisaun sira hotu. Wainhira ita haklaken Bandeira Repúblika Demokrátika Timor-Leste sa'e bá lalehan, ita hanoin fila fali dalan naruk ne'ebé povu Timor-Leste liu hodi konkista liberdade, independénsia no soberania. Kor no símbolu iha Bandeira Nasionál reprezenta korajen, sakrifísiu no esperansa husi jerasaun sira ne'ebé dedika sira nia moris bá konstrusaun Estadu no Nasaun. Wainhira ita kontinénsia Bandeira Nasionál, ita renova fali ita nia kompromisu atu serve povu ho lealdade absoluta, integridade, disiplina no profisionalismu,” dehan Ministru Defeza.

Ministru Defeza hatutan katak servisu bá pátria husu kompeténsia, dedikasaun no esperitu nasionalizmu husi ema ida-idak, liu-liu atu sempre koloka interese nasionál aas liu interese individuál. Tuir nia hateten, ameasa no dezafiu sira iha mundu ohin loron eziji instituisaun sira atu prepara an ho diak liu tan no hametin kapasidade atu responde ho efikásia.

Nia mós enfatiza katak importante atu reforsa kooperasaun entre Ministériu Defeza, Estadu Maior Jenerál F-FDTL, Autoridade Marítima Nasionál (AMN) no Institutu Defeza Nasionál (IDN), liuhusi promosaun kultura exelénsia, inovasaun, planeamentu estratéjiku no dezenvolvimentu kontinu ba kapasidade umana no institusionál.

“Servisu ba pátria eziji kompeténsia, dedikasaun no esperitu Nasaun. Tan ne'e, ita presiza reforsa koezaun nasionál no kapasidade instituisaun sira atu bele responde ho efikásia bá ezijénsia Defeza Nasionál. Iha kontestu ida-ne'e, kooperasaun entre Ministériu Defeza, Estadu Maior Jenerál F-FDTL, Autoridade Marítima Nasionál no Institutu Defeza Nasionál sai fator esensiál atu promove kultura exelénsia, inovasaun, planeamentu estratéjiku no dezenvolvimentu kapasidade umana no institusionál,” hateten tan Ministru Defeza.

Iha sorin seluk, Ministru Defeza konvida militar no sivil sira atu renova sira nia empenu iha hala'o knaar ho responsabilidade, esperitu ekipa, respeitu mútu no sentidu aas ba dever. Nia hateten katak tarefa hotu-hotu, maski simples, kontribui ba fortalese Defeza Nasionál no hametin progresu Timor-Leste.

“Ha'u konvida militár no sivil hotu atu hala'o servisu ho responsabilidade, esperitu ekipa no respeitu mútu. Tarefa ida-idak ne'ebé ita halo, maski simples, iha kontribuisaun importante bá fortalese Defeza Nasionál no hametin progresu Timor-Leste.

Serimónia hanesan ida-ne'e mós hametin patriotizmu no reforsa konfiansá ne'ebé povu fó mai ita atu defende soberania nasionál, preserva dame, proteje interese Estadu no kontribui bá futuru prosperidade, estabilidade no moris-di'ak bá ema hotu iha Timor-Leste. Maromak fó nafatin nia bensaun bá ita hotu no bá Repúblika Demokrátika Timor-Leste,” remata Ministru Defeza.

Ekipa Média F-FDTL