Membru F-FDTL Husi Kompanhia Enjiñaria Remata Ona Formasaun TOT Iha ETDA

Metinaro, 02 Junu 2025

FALINTIL-Forsa Defeza Timor-Leste (F-FDTL) servisu hamutuk ho Defence Coorporation Program (DCP) haruka membru F-FDTL nain 10 husi Kompanhia Enjiñaria tuir Formasaun kona-bá Training Other Trainers (TOT) iha East Timor Development Agency (ETDA) hodi prepara sai treinadór bá Militár Enjiñaria sira seluk no ohin termina ona sira nia formasaun.

“Forsa atu sai professional atu sai modernijasaun tenke iha kursu oioin, para sira hatene dezenvolve sira nia aan Unidade no Komponente sira, ida ne’e primeira vez mak loke bá Kompanhia Engjiñaria, hau hanoin aban bainrua sebele karik loke bá anibél Komponente tomak para Militár sira hotu bele mai partisipa hotu”, dehan Komandante Forsa Apoiu Jerál Koronel Celestino Pinto “DAELEBA” liu husi ninia diskursu.

Koronel DAELEBA mós akresenta liutan katak, iha futuru ita sei servisu diak liutan ho East Timor Development Agency (ETDA) para bele fasilita nafatin ita nia Militár sira la’os deit iha Enjiñaria maibé bele mós bá Komponente no Unidade sira hotu.

Komandante Forsa Apoiu Jerál Koronel Celestino Pinto “DAELEBA” mós husu bá Militár sira ne’ebé ohin remata ona Formasaun ne’e atu aprende nafatin bainhira fila fali bá imi nia Kompanhia karik atu aplika buat ne’ebé maka imi aprende durante loron 15 iha ETDA bá Militár sira seluk.

Partisipa iha serimónia ne’e maka Komandante Forsa Apoiu Jerál Koronel Celestino Pinto “DAELEBA”, Adjunto Adido Defeza Austrália Komandante Jensen, DCP, Diretór ETDA, Komandante Enjiñaria Kapitaun Terdede, Segundo Komandante Enjiñaria Tenente Leite, no Ofisiais, Sarjentus no Prasas F-FDTL.

Media F-FDTL

2^o Sar. Carceres