Membru F-FDTL Nain 1 Partisipa Kursu Komandante Eskadraun Forsa Aéreo Nian Iha Estadus Unidus Amérika

EUA, 08 Maiu 2026

Membru FALINTIL-Forsa Defeza Timor-Leste (F-FDTL), Kapitaun Aleixo Verdial Almeida, husi Komponente Aéreo F-FDTL, hamutuk ho Militár sira husi Nasaun 13 partisipa kursu internasionál sira iha Estadus Unidus Amérika.

Kursu sira ne’e mak International Officer School (IOS) no Squadron Officer School (SOS), ne’ebé realiza iha Air University, Alabama.

Partisipante sira hamutuk ema 550, inklui membru husi US Air Force, Air National Guard, Air Reservist no Departmentu Forsa Aérea EUA nian. Iha grupu estudante internasionál, kapitaun hamutuk ema 23 husi Nasaun 13 inklui Timor-Leste partisipa iha treinamentu refere.

Kursu IOS hahú iha loron 23 Fevereiru no remata iha 03 Marsu 2026. Enkuantu kursu SOS hahú iha 6 Abril no termina iha 08 Maiu 2026 ho durasaun semana lima.

Objetivu husi kursu sira ne’e atu prepara ofisiál kapitaun sira husi forsa aérea atu aumenta koñesimentu lideransa no kapasidade komandu, prepara sira atu sai komandante eskadraun iha futuru. Treinamentu refere hala’o iha Baze Forsa Aérea Maxwell, Alabama, Estadus Unidus Amérika.

Media F-FDTL