NOTISIA

Xefe Estadu Maior Jenerál F-FDTL Abertura Formasaun Da-uluk Ba Ofisiáis Superiores F-FDTL Kona-Ba Asaun Uniformizasaun Ba Funsaun Komandu No Kargu Xefia Iha F-FDTL

Media F-FDTL QG Notisia 23 de julho de 2026 Hare na'in: 9 0 minutes read

Baze Unidade CICNL, 20 Jullu 2026

Xefe Estadu Maior Jenerál F-FDTL Tenente Jenerál Domingos Raúl "Falur Rate Laek" halo abertura ba Formasaun da-uluk ba Ofisiáis Superiores F-FDTL kona-ba “Asaun Uniformizasaun ba Funsaun Komandu no Kargu Xefia iha F-FDTL”, ne'ebé halao iha Unidade CICNL.

Formasaun ida-ne'e nia objetivu mak atu uniformiza koñesimentu, kompriensaun no kapasidade Ofisiáis Superiores iha área lideransa, komandu no xefia, hodi hametin ezekusaun knaar tuir prinsípiu disiplina, responsabilidade no profesionalizmu militár.

Formasaun ida-ne'e reprezenta esforsu kontinua hodi hasa'e kualidade rekursu umanu no hametin estrutura komandu iha F-FDTL.

formasaun espesiál ba kuadru superior F-FDTL ho diviza Koronél ho objetivu atu prepara kuadru superior hodi responde ba futuru lideransa F-FDTL.

Formasaun ne'e sei hala'o durante semana rua iha Sentru Formasaun F-FDTL Prezidente Nicolau Lobato, Metinaro no Formadór sira mai husi Antigu Ministru Defeza Nasionál, Antigu Xefe Estadu Maior Jenerál F-FDTL no formadór balun sei mai husi formadór IDN. Antigu CEMGFA, Lere Anan Timur sei hola parte nu'udár formadór ne'ebé sei foku ba matéria lideransa nian.

Depois serimónia abertura remata, Xefe Estadu Maior Jenerál F-FDTL halo mós vizita ba Salaun Memorial hodi hare no respeita valor istóriku no sakrifísiu veteranu sira ne'ebé kontribui ba ukun-rasik-an.

Iha vizita ne'e, Xefe Estadu Maior Jenerál F-FDTL mós observa diretamente fatin han formandu sira nian, fatin deskansa no fatin formasaun, hodi asegura katak fasilidade no ambiente ne'ebé disponivel suporta prosesu aprendizajen no dezenvolvimentu profesional durante períodu formasaun.

Partisipa iha serimónia abertura ne'e maka hanesan Xefe Estadu Maior Jenerál F-FDTL Tenente Jenerál Falur Rate Laek, Xefe Estadu Maior Jenerál Reformadu Tenente Jenerál Lere Anan Timur, Eis Presidente Repúblika RDTL Taur Matan Ruak, Eis Ministru Defeza Brigadeiru Jenerál Ref. Filomeno Paixão de Jesus, Eis Ministru Defeza Dr. Roque Felix Rodriguez, Vise Xefe Estadu Maior Jenerál F-FDTL Major Jenerál Calisto Santos Coliati, Xefe Estadu Maior F-FDTL Brigadeiru Jenerál José da Costa Soares "Trix" reprezentante Ministru Defeza Sra. Ana Carla Carracalão Gomes, Xefe Inspesaun Jerál F-FDTL Major Jenerál Cornelio Ximenes "Maunana" Diretór Interinu Institutu Defeza Nasionál (IDN) Dr. Nuno Manuel Corvelo de Andrade Sarmento, Komandante Komponente Naval Komdoro Higino das Neves "Superman", inklui Assesor Sira.

Ekipa Média F-FDTL

Cabo J' Silva.