Xefe Estadu Maior Jenerál F-FDTL Partisipa Iha Loron Anzac Day Bá Dala 110 Iha Timor-Leste

Dili, 25 Abril 2025

 

Xefe Estadu Maior Jenerál FALINTIL-Forsa Defeza Timor-Leste (F-FDTL) Tenente Jenerál Falur Rate Laek, ohin partisipa iha komemorasaun loron ANZAC DAY bá dala 110 iha edifisiu Conselho dos Combatentes da Libertação Nacional (CCLN) Comoro, Dili.

 

Loron 25 Abril nu'udar loron nasionál komemorasaun Austrália no Nova Zelândia nian bá vítima sira funu nian no bá rekoñesimentu bá papél sira nia Forsas Armadas nian, ida ne'e hanesan asaun Militár bo'ot dahuluk ne'ebé maka halo hosi Forsa Austrália no Nova Zelândia nian durante Funu Mundiál Dahuluk.

 

ANZAC signifika Korpu Exército Austrália no Nova Zelândia nian, Loron Anzac maka komemorasaun ida bá aniversáriu hosi dezembarke tropa Australianu no Nova Zelândia nian iha Gallipoli, Turkia iha loron 25 fulan-Abril tinan 1915, bainhira Grã-Bretanha deklara funu hasoru Alemaña tanba nia invazaun bá Béljika iha tinan 1914, Austrália no Nova Zelândia, hanesan Dominion sira iha Impériu Britániku nia laran, automatikamente konsidera sira-nia an hanesan funu-na'in.

 

Partisipa iha komemorasaun loron Aniversáriun ANZAC ne'e kompostu husi Membru Governu, Korpu Diplomatika sira, Veteranus, FALINTIL-Forsa Defeza Timor-Leste (F-FDTL) Polisia Nasionál Timor-Leste (PNTL) nomós Adido Defesa sira iha Timor-Leste.

 

Media F-FDTL