Xefe Estadu Maior Jenerál F-FDTL Vijita Komunidade Sira Iha Naktuka RAEOA

Naktuka, 27 Setembru 2025

Xefe Estadu Maior Jenerál FALINTIL-Forsa Defeza Timor-Leste (F-FDTL) Tenente Jenerál Falur Rate Laek ne'ebé akompanha husi Prezidente Autoridade Rejiaun Administrativa Espesial Oekuse Ambeno (RAEOA) Sr. Régio Servantes Romeia da Cruz Salu halo Vijita supreja bá komunidade sira iha Bairu Naktuka, Aldeia Manán, Suku Bene Ufe, Sub Rejiaun Nitibe, Rejiaun Administrativa Espesial Oekuse Ambeno (RAEOA).

Iha intervista Tenente Jenerál Falur Rate Laek hateten, hau mai Vijita ne'e hanesan informal ida, tamba Itá nia komunidade sira mak husu , atu mai vijita sira, ntaun hau nia dever no obrigasaun atu hare, ne'e afirmasaun Itá nia soberania , ntaun Itá nia fronteira no rai, tamba nia mak Itá luta , tamba nia mak Itá mate no moris to'o ohin Itá Ukun Rasik aan, ntaun Itá tenke mai hare tamba rai ida ne'e maka Itá defende.

Nia hatutan kuando Itá halo ida ne'e, Itá tenke manifesta Itá nia sentimentu nasionalizmu , maibé Itá mós tenke fó omenajem bá Itá nia eroi no mártir sira ne'ebé mate no lakon hodi liberta rai ida ne'e.

Iha Vijita ne'e Xefe Estadu Maior Jenerál F-FDTL Tenente Jenerál Falur Rate Laek, akompanha husi Prezidente Autoridade RAEOA, Komandante PNTL RAEOA, Segundo Komandante Komponente Naval Kapitaun Fragata Guido Guterres, Adjunto Divijaun Lojistika Major Infantaria Grigório Soares, Komandante Postu F-FDTL RAEOA nomós delegasaun tomak.

Media F-FDTL

2' Sargento Carceres