XEFI ESTADU MAIOR JENERÁL F-FDTL ENSERA KURSU FORMASAUN INVESTIGASAUN OFISIAIS JUSTISA F-FDTL IHA QG

Kuartel-Jenerál, 10 novembru 2025

 

Xefe Estadu Maior Jenerál F-FDTL Tenente Jenerál Domingos Raúl " Falur Rate Laek" Halo enseramentu ba kursu báziku ofisiais justisa F-FDTL iha Kuartel Jenerál Fatuhada Dili.

Iha formasaun ne'e Fasilita husi Diretur Nasional Policia Cientifica Investigação Criminal (PCIC-sigla Portugês) Vicente Fernandes e Brito durante loron rua ba Militár sira husi Componentes no Unidades inklui mós Divizaun sira iha Kuartel Jenerál.

 

Iha intervensaun Xefe Estadu Maior Jenerál F-FDTL Tenente Jenerál Falur Rate Laek hateten ba pesoal militár ne'e laos formasaun ida simples maibé hanesan investimentu estratéjiku ba integridade F-FDTL nian.

 

"Ohin, ita halibur hamutuk atu konklui marka fundamentál ida iha formasaun ba ita-nia pesoál militár. Kursu Formasaun ba Investigasaun reprezenta la'os deit programa formasaun simples ida maibé ne'e hanesan investimentu estratéjiku ida iha exelénsia no integridade FALINTIL-Forsa Defeza Timor-Leste nian". hateten CEMGFA.

 

"ha'u hakarak hato'o ha'u nia agradesimentu kle'an ba formadór sira husi PSIC nian, ne'ebé, ho dedikasaun no kompetensia profisionál, fahe la'ós de'it koñesimentu tékniku maibé mós valór fundamentál sira investigasaun judisiál militár nian. Ita bo'ot sira nia kontribuisaun folin-boot tebes ba dezenvolvimentu institusionál ita-nia forsa armada nian".

 

"Investigasaun militár la'ós ezersísiu burokrátiku de'it, maibé instrumentu krusiál atu salvaguarda legalidade, dixiplina, no étika iha ita nia instituisaun, Formandu sira ida-idak agora sai nu'udar guardiaun la'ós de'it ba orden militár maibé ba justisa iha nia sentidu luan ka abranjente".

 

"Edukasaun kontínua maka imperativu kategoriku ida ba organizasaun modernu ruma. Koñesimentu la'ós destinu ida, maibé jornada permanente ba aprendizajen no aperfeisoamentu".

"Kooperasaun institusionál hanesan ita iha ohin loron ho PSIC -mak fundasaun ba dezenvolvimentu organizasionál. Só liu husi fahe koñesimentu no esperiénsia sira maka ita bele hasa'e ita-nia padraun sira ho exelénsia".

 

"Respeitu ba legalidade la'ós opsaun, ne'e obrigasaun fundamentál ofisiál ida-idak, no militár hotu-hotu nian. No responsabilidade ida-ne'e ezije rigor, integridade, no kompromisu ne'ebé metin ba prinsípiu étiku sira".

 

"Ofisiál foin-sa'e sira ne'ebé prezente iha ne'e, ha'u husik hela dezafiu ida: transforma koňesimentu ne'ebé hetan ba asaun responsável. Ita-boot sira nia misaun ultrapasa kumprimentu burokrátiku funsaun sira-nian ne'e reprezenta garantia ba valór fundamentál sira husi ita nia Estadu Direitu, Konta ho Ita-Boot sira-nia dedikasaun atu hametin nafatin ita-nia instituisaun sira, atu hametin lasu sira kooperasaun institusionál nian, no fó onra ba legadu justisa no integridade FALINTIL - Forsa Defeza Timor-Leste nian" Remata.

 

Parisipa iha serimónia enseramentu ne'e mai husi Komandante sira husi Componentes no Umidades Xefe Divizaun sira iha Kuartel Jenerál inklui mós formandos sira.

 

Ekipa Média F-FDTL

Boni Mendonça