Adidu Defeza TL iha Indonesia partisipa Serimónia enseramentu Edukasaun lideransa ho estratéjia Nasionál no Graduasaun Tenente Koronel Grad. Hélio Quintas iha Lembaga Ketahanan Nasionál Republik Indonesia (LEMHANNAS RI)

Jakarta, 07 Jullu 2026

Adidu Defeza Timor-Leste iha Jakarta Koronel Renilde Guterres Corte Real e Silva akompaña husi Adjuntu Adidu Defesa 2ºTen. Fuzileiro João da Silva Soares, partisipa iha serimónia enseramentu edukasaun lideransa no estratéjia Nasionál no graduasaun TenCor. Grad Hélio Filipe Dias Quintas, ne’ebé remata ho susesu iha edukasaun lideransa no estratéjia Nasionál iha LEMHANNAS RI.

Programa ida ne’e prepara lider sira atu bele responde ba dezafiu estratéjiku, seguransa no dezenvolvimentu Nasionál iha futuru. ida ne’ebé foka ba dezenvolvimentu kapasidade lideransa, análize ambiente estratéjiku, reziliénsia nasionál, jestaun krizis no kooperasaun seguransa rejionál.

Serimónia enseramentu edukasaun lideransa no graduasaun ba graduante Lemhannas RI ba dala 69 tinan 2026 ne’e hala’o ho solene no lidera husi autoridade a’as LEMHANNAS RI nian, Governador Lemhannas RI, Dr. H. TB. Ace Hasan Syadzily, M.Si., akompaña husi vise Governador Lemhannas RI, Laksdya TNI Erwin S. Aldedharma , no prezensa hosi reprezentante membru Governu Indonesia, Deputadus, Ofisiais superiors TNI, POLRI, korpu diplomátiku, no adidu defeza husi nasaun sira ne’ebé akreditadu iha Jakarta inklui Timor-Leste.

Graduante sira Hamutuk ema Na’in 110, Na’in 104 graduante sira husi Ministériu no Intituisaun Sira Indonesia nian, TNI, POLRI no Graduante Na’in 6 seluk husi estranjeiru, mak hanesan Austrália, Índia, Kamboja, Malázia, Singapura, no Timor-Leste.

Serimónia enseramentu edukasaun lideransa Nasionál ida ne’e ofisialmene taka husi Governador Lemhannas RI, no continua ho serimónia graduasaun ba graduante sira.

Iha deskursu Governador Lemhannas RI, Fó Parabéns ba graduadu hotu ne’ebé ho pasensia, disciplina, Vontade no komitmentu hodi konsege remata Estudu iha Lemhannas RI.

Nia subliña, Graduasaun ida-ne’e la’ós finál, maibé hahú responsabilidade foun atu implementa valór Nasionál, lideransa estratéjika no servisu ba povu no nasaun. hein katak graduadu sira bele hametin kolaborasaun entre instituisaun sira, hasae kapasidade atu responde ba ameasa Nasionál no global, no kontinua sai ezemplu ba integridade, nasionalizmu no profesionalizmu iha servisu. servisu hamutuk hodi harii nasaun ida-ne’ebé forte, resiliente no prósperu.

Iha okaziaun ne’e, Ten.Cor Grad Hélio Quintas akompaña husi Espoza Sra. Deolinda Ferreira simu Diploma graduasaun ho PIN Lemhannas hanesan rezultadu ikus partisipasaun ativa durante programa estudu lideransa estratéjika. ida ne’ebé enfatiza dezenvolvimentu kapasidade lideransa, análize jeopolítika, reziliénsia nasionál no kooperasaun estratéjika entre instituisaun sira.

Partisipasaun Adidu Defeza iha serimónia ne’e hatudu kontinuidade relasaun amizade no kooperasaun ne’ebé di’ak no forte entre Timor-Leste ho Indonesia, liuliu iha área edukasaun militár, dezenvolvimentu rekursu umanu no diplomasia defeza, nomos Graduasaun Ten. Cor Grad, Hélio Quintas ida ne’e sai hanesan simbolu importante ida ba fortalesimentu kapasidade ofisiál F-FDTL iha área lideransa estratéjika no seguransa nasionál, ne’ebé bele kontribui ba dezenvolvimentu instituisaun Defeza nian.

Adidu Defeza apresia oportunidade hodi partisipa iha serimónia importante ida ne’e no fó parabéns ba Ten. Cor Grad, Hélio Quintas ba nia susesu akademiku. Espera katak kooperasaun entre Timor-Leste no Indonesia, liuliu ho LEMHANNAS RI, sei kontinua hametin liu tan, hodi dezenvolvimentu kapasidade lideransa ba benefísiu nasaun rua no promove paz ho estabilidade rejionál.

Ekipa Média F-FDTL

Adjuntu Adidu Defeza TL iha Indonesia

2ºTen. Fuzileiros João da Silva Soares