NOTISIA

Advogadu Celestino Guterres: Tenente Jenerál Falur Rate Laek Inosente No La Iha Relasaun Ho Disputa Rai Iha Hera

Media F-FDTL QG Notisia 27 de julho de 2026 Hare na'in: 6 0 minutes read

Dili, 24 Jullu 2026

DILI — Advogadu Celestino Guterres, husi Fundasaun Lia Los, hamutuk ho ekipa husi Kuartel Jenerál F-FDTL iha Fatuhada, liuhusi Seksaun Justisa no Relasaun Públika F-FDTL, ohin marka prezensa iha Tribunal Judisiál Primeira Instánsia Dili, atu submete kontestasaun ba prosesu Kazu sivíl ne'ebé Sidadaun ida hato'o pedidu provídensia kautelár ba Tribunál Judisiál Primeira Instánsia Dili (TJPID) hasoru Xefe Estadu Maiór Jenerál Forsa Armada (XEMGFA) Tenente Jenerál Domingos Raúl "Raul Falur Rate" liga ho kumpre no venda rai ida iha Hera, Postu Administrativu Kristu Rei Munisípiu Dili.

Tuir deklarasaun Advogadu Celestino Guterres, afirma prosesu ne'e hatama husi parte ida ne'ebé reklama disputa kona-ba rai ida iha Hera, Advogadu ne’e heteten tuir faktu no dokumentus ne'ebé iha, Tenente Jenerál Falur Rate Laek la iha relasaun ho rai ne'ebé disputa, no la halo transasaun komérsiu ka sosa rai ne'e.

Advogadu Celestino esplika katak, prosesu sivíl ne'e tama iha Tribunal iha forma prosesu providensiál, no parte ne'ebé reprezenta Tenente Jenerál Falur Rate Laek hatama kontestasaun dentro prazu loron 10, tuir prazu legál ne'ebé determina. kontestasaun ne'e entrega iha Tribunal, Tamba loron ikus ba prazu monu iha Domingu 26 Jullu 2026, ho nune’e tribunal deside hodi adia ba iha loron Sexta-Feira, 24 Jullu 2026.

“Iha kontestasaun, ami hatete klaru katak Tenente Jenerál Falur Rate Laek inosente no la hatene kona-ba kazu ne'e. Nia la hola parte iha rai ne'e no la iha relasaun ho disputa rai ne'ebé dadauk iha prosesu,” dehan Advogadu Celestino.

Nia mós afirma katak, tuir dokumentasaun ne'ebé sira iha, disputa kona-ba rai ne'e iha ona desizaun judisiál iha tinan 2021. Desizaun ne'e, tuir nia, tun iha loron 26 Fevereiru 2021, no laiha parte ida halo rekursu ka reklamasaun iha prazu ne'ebé determina.

Advogadu Celestino hatete katak, durante tinan 2021 to'o 2025, prosesu kona-ba rai ne'e kontinua iha autoridade relevante sira, inklui levantamentu no sukat rai husi entidade kompetente iha área Terras no Propriedade, ho objetivu atu kontinua prosesu rejistu no emisaun sertifikadu.

Tuir nia, depois de prosesu ne'e lao kleur, derepente mosu tan prosesu sivíl foun ne'ebé dirije kontra Tenente Jenerál Falur Rate Laek, maski, tuir alegasaun advogadu, Tenente Jenerál ne'e la halo kompra rai ruma iha área ne'ebá no la iha ligasaun direta ho disputa rai ne'e.

Advogadu Celestino mós reafirma katak, tuir informasaun ne'ebé nia hatene, rai ne'ebé disputa iha ona reklamasaun iha tempu liubá no envolve área hamutuk besik 6.018 metru kuadradu. Nia konsidera katak, tanba iha ona desizaun judisiál kona-ba matéria ne'e, parte sira tenke konsidera no respeita prosesu no desizaun ne'ebé antes ona.

Nia subliña katak, iha kazu sivíl, bainhira ema ida hetan mandatáriu ka reprezentante legál, advogadu mak hala'o prosesu reprezentasaun iha tribunal, tuir autoridade no mandatu ne'ebé fó ba nia.

Advogadu Celestino Guterres, husi Fundasaun Lia Los, afirma katak sira sei kontinua akompaña no defende pozisaun Tenente Jenerál Falur Rate Laek liuhusi mekanismu legál ne'ebé disponivel, no hein atu Tribunal analiza faktu, dokumentus no evidénsia sira hotu tuir lei.

Ekipa Média F-FDTL

Cabo J' Silva