CEMGFA Partisipa Serimónia Tomada de Posse Ba Kapitaun No  Adjuntu Portu Dili

Tibar-Portu Dili 30 Juñu 2025

(Média F-FDTL) Chefe Estado Maior General das Força Armadas (CEMGFA) Hanesan Mos Autoridade Maritìma Nasionál (AMN) Tenente General Domingos Raúl "Falur Rate Laek" hamutuk ho Ministru Defeza, Kontra-Almirante Donaciano do Rosário Costa Gomes Ph.D "Pedro Klamar Fuik" partisipa iha Serimónia Tomada de posse ba Emposado Nain rua hanesan Kapitaun Tenente Raul Vicente S. Correia Asumi Kargu nu'udar Kapitaun Portu Dili no 1° Tenente Manuel Guterres Soares Kargu nu'udar Adjuntu Kapitaun Portu Dili.

"Ho onra no satisfasaun bo’ot mak ha'u dirije ba ita-bo’ot sira hotu iha momentu signifikativu ida-ne'e ba Autoridade Marítima Nasionál no ba kontrolu ita-nia tasi iha ámbitu juridisaun nasionál. Ohin ita selebra tomada de posse ba Kapitaun Portu nian no nia Adjuntu, profisionál na' in rua ne'ebé sei sai fundamentál iha jestaun no fiskalizasaun ba ita-nia atividade marítima" Diskursu CEMGFA  iha Portu Dili Tibar Segunda-Feira, 30/06/2025 ne'e.

"Ba dirijente foun sira, Kapitaun Portu no Adjuntu, ha'u dezeja katak ita bo’ot sira hala'o kna'ar ho integridade, dedikasaun no espíritu servisu ba públiku. Ami hotu Garante iha ita-bo’ot sira atu hasoru dezafiu sira ne'ebé bele mosu no atu halo inovasaun hodi buka solusaun sira ne'ebé fó benefisiu la'ós de'it ba setór marítimu, maibé mós ba ita-nia populasaun" CEMGFA ne'e Informa.

CEMGFA ne'e haktuir tan katak  nu'udar Autoridade Marítima Nasionál (AMN), apoiu no  esforsu iha konviksaun katak, ho lideransa vizionáriu no kolaborasaun husi parte interesada sira hotu, ita sei bele alkansa patamar foun iha jestaun marítima Timor-Leste nian.

"Atribuisaun no kompeténsia sira neʼebé bo’ot no área jurizdisaun neʼebé luan impoin nesesidade ba ekipamentu, meios, kooperasaun no kolaborasaun interinstitusionál entre liña ministeriál sira hotu ne'ebé forma Sistema Autoridade Marítima Nasionál, hodi bele identifika komplementariedade no halibur sinerjia, nune'e garante defeza ita nia tasi ba bem públiku neʼebé sai ita-nia identidade no ita-nia fonte sobrevivénsia" Haktuir CEMGFA.

iha Parte seluk mos Tenente Jenerál husu atu  servisu públiku ida ne'ebé efetivu, efisiente no ho kualidade iha termu inspesaun, polisiamentu no seguransa navegasaun nian ba ema no sasán sira hotu, tuir koñesimentu no responsabilidade.

Partisipa iha Serimonia ne'e CEMGFA Tenente Jenerál Falur Rate Laek, Ministru Defeza, Kontra-Almirante Donaciano do Rosário Costa Gomes Ph.D "Pedro Klamar Fuik" Membrus Governu ne'ebé halo parte iha Sistema AMN reprezentante,Tenente Jenerál Reformadu Lere Anan Timur, Diretor Autoridade Marítima (DAM), Atual Comandante CN Komodoru Higino das Neves, Comandante CAL, Autoridade Munisipál Liquiçá, Adidus Defeza no Asesór Internasionál sira, Xefe Gabiente sira, Prezidente Institutu Públiku, Diretór Jerál sira, Diretór Nasionál, pontu fokál, liña ministeriál sira no mós Komandantes husi PNTL no F-FDTL sira.

Ekipa Média F-FDTL