CEMGFA Partisipa Serimónia Tomada de Posse ba Konsellu Administrativu IDN Foun

(Média F-FDTL) Chefe Estado Maior General Forsas Armadas (CEMGFA) (Sigla Português) Partisipa iha Serimónia Tomada de Posse ba Konsellu Administrativu foun, ne'ebé realiza iha Auditóriu Instituto Defesa Nacional (IDN), iha Palásiu Governo, Tersa-Feira 23/06/2025 ne'e.

iha Serimónia refere ofisialmente fo posse husi Ministru Defeza (MD), Kontra-Almirante Donaciano Costa Gomes Ph.D "Pedro Klamar Fuik", ba Konsellu Administrativu Foun hanesan Dr. Nuno Corvelo Sarmento Nu'udar Diretór Interinu IDN, Dra. Josefa dos Reis Gonçalves asumi kargu nu'udar Diretóra Jerál Jestaun no Rekursu no Kapitaun Fragata Graduadu Nicolau Sousa Guterres nu'udar Diretór Ensinu Formasaun, hodi Subtitui Konsellu Administrativu Sesante Dr. Guilherme de Jesus da Costa Soares no Kapitaun Fragata Duarte Borges Loe.

Serimonia Refere bazeia mós ba determinasaun no Vizaun estratéjika husi Ministériu Defeza atu reforsa kapasidade IDN no kontinuidade lideransa iha Institutu defeza nasionál nune'e Tomada de pose ne'e mós reflete ona kompromisu forte ba inovasaun, revitalizasaun, no fortalesimentu institusionál IDN ba tempu oin.

Nune'e mós Membru Governu Da-9 ne'e husu lideransa foun ne'ebé asumi kna'ar foun husu atu responsabiliza hodi implementa polítika edukasaun defeza, investigasaun Sientífika no promosaun kooperasaun institusional, nune'e reforsa mós papel IDN hanesan sentru estratéjiku edukasaun seguransa no defeza nian iha Timor-Leste.

Hafoin Serimónia ne'e remata Ministru Defeza, Akompaña mós husi Xefi Estadu Maior Jenerál F-FDTL entrega sertifikadu rekoñesimentu ba Diretór Interinu sesante Dr. Guilherme de Jesus da Costa Soares no mós Kapitaun Fragata Duarte Borges Loe nu'udar onra ida ba kontribuisaun sira Durante asume pozisaun iha IDN.

Iha serimónia ofisiál ne'e, marka prezensa husi Ministru Defeza, Kontra-Almirante Donaciano Costa Gomes Ph.D "Pedro Klamar Fuik", Xefi Estadu Maior Jenerál F-FDTL, Tenente-Jenerál Domingos Raúl "Falur Rate Laek" Ofisiais Superiores husi F-FDTL, Ofisiais husi PNTL, Prezidente Komisaun Funsaun Públika Dr. Agostinho Letêncio de Deus no mós asesór, jestór no funsionáriu sira hotu husi IDN, seguransa no Defeza inklui mós Funsaun Públika.

Ekipa Média F-FDTL