Komandu F-FDTL Ho PNTL Ensera Forsa Tarefas Konjunta Iha Bairo Pite

Kuartel UEP,16 Janeiro 2026

Komandu FALINTIL-Forsa Defesa Timor-Leste(F-FDTL) liu husi Xefe Estadu Maior Jenerál FALINTIL-Forsa Defeza Timor-Leste (F-FDTL) Tenente Jenerál Domingos Raúl "Falur Rate Laek" halo Enseramentu Operasaun Ouro Forsa Tarefas Konjunta(FTC) F-FDTL ho PNTL ne'ebé kumpri ona misaun Durante serimónia loron Nasionál sira inklui mós loron Natal no Tinan foun ho susesu.

"Molok hato'o konsiderasaun ruma, permite ha'u atu hahú intervensaun ida-ne'e hodi dezeja bá entidade hotu ne'ebé prezente, no liuliu bá mane no feto ne'ebé serbi iha fileira PNTL no F-FDTL. Hein katak siklu foun ida ne'ebé agora hahú lori prosperidade, estabilidade, no dame bá Timor-Leste".hateten Tenente Jenerál Falur Rate Laek iha UEP Bairo Pite Dili.

"Ita halibur malu ohin hodi enserra formalmente Forsa Tarefa Konjunta, maibé liuliu, atu rekoñese méritu esepsionál husi serbisu ne'ebé hala'o husi pesoál sira PNTL no F-FDTLnian. Sira nia dezempeñu durante ezersísiu operasionál ida-ne'e sai ezemplu kona-bá profisionalizmu no dedikasaun. Susesu misaun ne'ebé asegura ita-nia populasaun sira-nia trankuilidade durante selebrasaun nasionál no tempu festividade, bazeia bá sira-nia sakrifisiu pesoál no laran-luak".

"Ita hotu rekoñese, neduni presiza husik hela apontamentu balun kona-bá realidade tátika ne'ebé ita hasoru. Operasaun sira iha terrenu konfronta ho dezafiu lojístiku no operasionál, liu-liu iha termu mobilidade bá área remota, jestaun rekursu umanu hodi kobre postu hotu-hotu, no kapasidade komunikasaun no protesaun individuál. Difikuldade sira-ne'e, ne'ebé hasoru rasik husi sira ne'ebé hala'o operasaun iha liña oin merese iha ne'e konsiderasaun ho respeitu ba órgaun sira ne'ebé foti desizaun katak modernizasaun ita-nia forsa tenke la'o hamutuk ho ezijénsia sira husi misaun sira ne'ebé atribui".

"Ha'u dehan ida-ne'e tanba misaun la remata iha ne'e. Ambiente seguransa ne'e dinámiku no ezije prontidaun permanente husi ita hotu. Tanba ne'e ha'u hakarak anunsia katak iha tempu badak ita sei intensifika servisu hamutuk. Operasaun foun sira ne'ebé foka ba kombate atividade irregulár sira iha territóriu nasionál, no krusialmente intensifikasaun rigorozu ba kontrolu fronteira hodi mitiga atravesa no entrada ilegál sira".

"Ba ida-ne'e, importante tebes atu ita konsolida doutrina ida ne'ebé loos kona-bá interoperabilidade. Kooperasaun entre F-FDTL no PNTL labele sirkunstánsia de'it; maibé tenke estruturál. Ita tenke kuda sentidu ida ne'ebé klean kona-bá responsabilidade ne'ebé partilladu. Ita serve objetivu ida de'it: soberania no seguransa ita nia populasaun nian".

"Iha sentidu ida-ne'e, ha'u husu no apela bá Militár ida-idak no Polísia ida-idak atu mantein konduta étika iha nível hotu-hotu. Farda ne'ebé ita hotu hatais nu'udar símbolu lulik bá Nasaun. Hotu-hotu tenke evita, ho kustu saida deit, partisipasaun ruma ka komplisidade ho atividade ilísitu ka illegal sira no kombate favoritizmu hodi inklina bá grupu ruma.

Hahalok hanesan ne'e la'ós de'it sobu imajen no kredibilidade husi ita-nia instituisaun nobre, maibé estraga fundasaun sira husi Nasaun ne'ebé harii ho sofrimentu, ruin no ran ne'ebé ita jura atu defende. Disiplina no integridade mak ita-nia forsa bo'ot liu. Ne`eduni hau apela bá hotu-hotu atu korije hahalok sira ne'e, mantein vijilansia no respeita bá kadeia komandu".

"Ikus liu, liafuan agradesimentu klean nian ne'ebé hau dirije bá retaguarda silensioza husi ita nia forsa rua: família sira. Bá kaben, inan-aman, no oan sira husi pessoál Militár no Polisial, ha'u espresa ha'u nia agradesimentu klean bá pasiénsia, komprensaun, no apoiu inkondisionál ne'ebé hatudu durante auzénsia naruk husi ema ne'ebé ita bo'ot sira hadomi. Ita bo'ot sira nia sakrifisiu nu'udar parte integrante ida bá susesu seguransa Nasionál nian, Mai ita hotu-hotu kontinua serbí ho onra, lealdade no aten-brani".

Partisipa iha Serimónia ne'e Xefe Estadu Maior Jenerál F-FDTL Tenente Jenerál Falur Rate Laek, Komandante Jerál PNTL Komisario Henrique da Costa, Xefe Estadu Maior F-FDTL Brigadeiro Jenerál José da Costa Soares "Trix", Segundu Komandante Jerál PNTL Komisario Pedro Belo, Ofisiais Superiores husi F-FDTL no PNTL, Komandante Komponentes no Unidade, Komandante Munisípiu tomak, inklui Forsa Parada husi F-FDTL no PNTL.

Ekipa Média F-FDTL

Sargento Carceres & Bonifaçio Mendonça