Komandu F-FDTL Realiza Kompetisaun Ordem Unida

Metinaro, 06 Agostu 2026

Komandu FALINTIL-Forsa Defesa Timor-Leste (F-FDTL) realiza kompetisaun Ordem Unida bá membru F-FDTL husi Komponente no Unidade sira. Atividade ne'e hala'o iha Sentru Instrusaun Komandante Nicolau Lobato (CICNL), Metinaro.

Iha abertura atividade ne'e, Segundo Komandante CICNL, Major David Leopoldo dos Santos, hateten katak kompetisaun ida ne'e la'ós atu buka se mak manán ka lakon, maibé atu hametin unidade, disiplina no kapasidade lideransa bá membru hotu. Nia dehan katak manán ka lakon, rezultadu ne'e pertense bá F-FDTL tomak.

Nia mos fó énfase liu bá Militár feminina sira, hodi enkoraja sira atu prepara-an no dezenvolve sira-nia kapasidade lideransa. Tuir nia, atualmente komandante parada barak mak feto, ne'ebé sai indikasaun di'ak katak feto sira mós iha kapasidade atu kaer kargu lideransa.

Major David hatutan tan katak, lori komandante sira nia naran, hakarak motiva no enkoraja membru hotu, liuliu Militár feminina sira, atu la sente katak oportunidade la iha. Komandu sei kontinua fó oportunidade hanesan bá mane no feto, no agora fila fali bá membru sira atu aproveita oportunidade hirak ne'e ho di'ak. Nia mós espresa nia esperansa katak kompetisaun ida ne'e sei hala'o ho disiplina, responsabilidade no vontade tomak.

Aleinde ne'e, nia sujere bá Seksaun Jéneru F-FDTL atu atividade hanesan ne'e la para iha ida ne’e deit, maibé kontinua organiza atividade sira seluk ne'ebé fó atensaun bá dezenvolvimentu lideransa bá Militár feminina sira. lori naran Komandante Forsa Apoiu Jeral no Komandante CICNL, nian ofisialmente hau loke kompetisaun Ordem Unida ida ne'e.

Kompetisaun Ordem Unida ne'e organiza husi Seksaun Jéneru F-FDTL, ne'ebé lidera husi Kapitaun Marquita da Cunha ho nia ekipa tomak. Remata.

Media F-FDTL

Izidor Lopes