Komandu F-FDTL Realiza Serimónia Hasa’e Bandeira Nasionál Semana Dahuluk Bá Fulan Agostu

DILI-Komandu FALINTIL-Forsa Defeza Timor-Leste (F-FDTL) hamutuk Ministeriu Defeza (MD), Instituto Defeza Nasionál (IDN) no Autoridade Marítima Nasionál (AMN) realiza serimónia hasae Bandeira Nasionál semana dahuluk fulan Agostu nian no nu'udar fulan ida ne'ebé ezijente tebes ba Instituisaun F-FDTL.

Tuir Xefe Estadu Maior Jenerál FALINTIL-Forsa Defeza Timor Leste (F-FDTL), Tenente Jenerál Domingos Raúl “Falur Rate Laek” hatete iha serimónia hasae Bandeira Nasionál ida ne'e marka inísiu ba fulan ida tan serbisu ba nasaun no povu ida nee.

"Hau dirije ba ita boot sira hotu ho konxiénsia klara katak fulan Agostu aprezenta an nu'udar fulan ida ne'ebé ezijente tebes ba ita nia Instituisaun," hatete Xefe Estadu Maior Jenerál FALINTIL-Forsa Defeza Timor Leste (F-FDTL), Tenente Jenerál Domingos Raúl “Falur Rate Laek” ba jornalista sira liu husi deliskursu iha âmbitu serimónia hasae Bandeira Nasionál iha Kuartel Jenerál F-FDTL Fatuhada Dili, segunda feira (03/08/2026).

Nia dehan, kalendáriu oin mai halibur hamutuk, iha tempu badak nia laran, kompromisu sira ho natureza distinta, maibé ho relevánsia hanesan eventu internasional sira hanesan Dili maratona no simeira ba dezenvolvimentu siénsia, ne’ebé projeta imazen Timor-Leste nian. No serimónia sira ho natureza Nasionál eminente, hanesan komemorasaun sira loron 20 no 30 fulan-Agostu nian.

"Fulan Agostu nian ne'ebé bolu ita atu hanoin no selebra ita nia povu nia identidade koletiva. Haree ba konsentrasaun responsabilidade sira ne'e, hau apela ba esforsu hotu ne’ebé redobradu iha koordenasaun entre orgaun no unidade sira hotu ne’ebé envolve, atu nune’e eventu ida-idak akontese ho rigor, dixiplina, no Exselénsia ne'ebé sai hanesan marka Forsas Armadas nian," nia tenik.

Konaba loron 20 fulan Agostu ne'e Tenente Jeneral Falur Rate Laek hakarak atu foka ho enfaze partikular.Tanba ne'e Loron FALINTIL nian, sei selebra iha Matebian.

"Ezije ita nia dedikasaun eskluziva no komprometimentu tomak. Ba sira hotu ne’ebé halo parte iha Komisaun Organizadora, no ba sira hotu ne’ebé sei simu kna'ar, hau husu atu ezekuta ho rigor no sentidu misaun nian ne'ebé okaziaun ezije. Ne'e laos serimónia ida hanesan sira seluk, ne'e kona-ba fó onra ba ema hotu ne'ébe saran an ho sakrifísiu atu ohin ita bele livremente hasae Bandeira ida ne'e," nia Informa.

Nia deklara ba eroi konesidu no eroi anonimu sira hotu, ne'ebé istória dalaruma la konsege prezerva sira nia naran, maibé sira nia dedikasaun sei nunka haluha, ne'ebé mehi kona-ba Timor-Leste ida ne'ebé diak liu sein iha oportunidade atu haree.

"Hau dirije mensajen ida ne'e ba ita hotu, hirak ne'ebé ohin loron serví F-FDTL no Ministériu Defeza, servisu labele sura kolen atu halo sira nia mehi sai realidade. Ida ne'e maka signifikadu klean husi ita nia dever atu fó onra, serbisu no dixiplina loron-loron nian, ba buat ne'ebé maka ema seluk selu ho sira nia moris rasik," nia hatutan.

Nia koalia, aproveita mós semana dahuluk fulan Agostu ida ne'e hodi formaliza promosaun kadetes timoroan sira ne'ebé kompleta ho susesu Akademia Militár iha Indonezia (AKMIL) ne'ebé sira nia serimónia graduasaun halao iha Jakarta iha loron 22 fulan-Jullu 2026. Sira nee mak timoroan dahuluk ne'ebé frekuenta AKMIL, rezultadu ne'ebé hetan nu'udar rezultadu husi kooperasaun militár entre F-FDTL no Ezérsitu Nasionál Indonézia (TNI), no mós kompromisu tekniku-militár ne'ebé sustenta parseria nee.

Nia dehan, serimonia ida nee ho objetivu presizamente aliña formasaun ne'ebé hetan iha instituisaun ne'eba ho kategoria korrespondente iha F-FDTL nian hodi halo promosaun.

"Ba graduadu nain haat, hau oferese liafuan ho méritu rekonesidu, ba Angkatan Darat, Keyduli R. Graça de Jesus Carvalho no Giovanino Fátima dos Santos Alves; ba Angkatan Udara, Experi Jezinho Gomes Raúl; no ba Angkatan Laut, Lucas Mau Buti Araújo dos Santos. Hotu-hotu hetan rezultadu ezemplar no sei kontinua iha tempu badak ba espesializasaun ba sira nia ramu ida-idak. Ita-boot sira nia dedikasaun fó onra ba ami hotu, no fó onra ba farda ne'ebé uza ohin," katak nia.

Nia subliña katak, investimentu Rekursu Umanu iha Forsa Armada sai nafatin primordial. "Ita tenke kontinua aproveita apoiu husi ita nia parseiru dezenvolvimentu sira, maibé internalmente, dezenvolve ita nia inisiativa rasik, partikularmente iha kuadru Asaun Uniformizasaun nian ne'ebé reforsa koezaun no identidade institusionál. Hein katak fulan Agostu ida ne'e halo ita unidu, dixiplinadu, no merese memória ne'ebé ita tenke fó onra," nia afirma.

Ekipa Média F-FDTL

2' Sarg. Carceres/Cabo J' Silva