Udan Bo'ot Estraga Infraestrutura Iha Komponente Naval F-FDTL
Hera, 02 Janeiru 2025
Komandante Komponente Navál F-FDTL, Komodoro Higino das Neves, udan Ne'ebé akontese iha kuarta (1/1/2025) horseik iha Hera rezulta infraestrutura militár iha Komponente Naval pursentu 90 maka hetan estragus.
Nia dehan, barajen Ne'ebé mak empreza halo ne'e ho medida ki'ik ho nune'e lebele satan mota Ki'ik iha area Hera nia nune'e bainhira udan husi foho intensidade bo'ot lakonsege sata mota nia intensidade nune'e mota tenke halai tama bá iha baze Komponente Naval laran hodi estraga fasilidade Militár iha baze Naval Hera.
¨Horseik loraik komesa udan uituan derepente mota tolu iha Hera hasoru malu Bronjon ne'ebé empreza halo mai Komponente Naval ne'e badak liu entaun mota tolu ne'e hasoru malu entaun fura tiha Bronjon ne'e no bee tama mai iha baze Naval destrui infraestrutura iha baze Naval hera.Fasilidade Militár ne'ebé mak hetan estragus ne'e pursentu 90 mak la aproveita hotu kompostu husi karreta rua mak aat, karreta sira seluk aat maibé balun sei moris, motor Militár sira nian mak kuase barak mak aat, no kilat sira bee tama hotu hodi hetan estragus, kazerna sira la aproveita hotu tanba bee tama inklui komputador sira mós hanesan,¨ dehan Komandante Komponente Naval Komodoro Higino das Neves.
Nia dehan desde horikalan kedan too mai ohin loron Komponente Naval la halo servisu tanba sasan hotu hotu bee hoban hotu.
¨Ohin dader ami hamoos, ami desde horikalan la tein tamba bee tama no apartir horikalan la tein sira Metinaro mak tein hodi ofereae bá Komponente Naval¨,nia adianta.
Neves haktuir Forsa Terestre Baucau mós tun mai ajuda, hodi hamoos foer sira inklui Unidade FALINTIL, Unidade Polisia Militár, Kuartel Jenerál, Sentru Insrtusaun Metinaro, Forsa Engenharia, inklui Bombeiros, Institutu Jestaun Apoiu Ekipamentu Dezenvolvimentu Infraestrutura (IGEADI, sigla portuges) no Ministeriu Obras Publika, para mai ajuda halo normalizasaun bá mota nune'e udan karik mota labele tama tan Komponente Naval nia fatin.
Nia esplika tuir lolos barajen ne'ebé mak empreza halo ne'e atu too iha tasi maibé empreza lakonsege halo ida ne'e no nia husik barajen ne'ebé mai Komponente Naval ne'e badak tanba ne'e too tempu udan mota suli mai sobu tiha nune'e provoka inundasaun ohin loron Komponte Naval sai sofre.
¨Inundasaun ne'e dala haat ona, mas ida ne'e mak aat liu. No fatin ida ne'e fila bá hanesan normal ne'e presiza semana ida¨ nia informa.
Iha fatin hanesan Xefe Estadu Maior F-FDTL, Brigadeiro Jenerál José da Costa Soares "TRIX" hateten infraestrutura Militár no fasilidade Militár iha Komponente Naval Hera pursentu 90 sasan hotu hotu destroidu tanba kauza husi udan bo'ot horseik loraik tuku rua.
Nunee mós Vise Xefe Estadu Maior Jenerál F-FDTL Major Jenerál Calisto Santos Coliati realsa kona bá kilat no ba ekipamentu hotu hotu, ropa Militár sira nia kazerna destroidu total.
¨Konta dehan infrastrutura iha baze Naval Hera destroidu inklui kilat. ida ne'e mak presiza intervensaun urjente husi Obras Publika tanba baze Naval ne'e Nasaun ninia ne'e la'os individu, ne'e la'os kompania privadu ruma ne'e infraestruta baze Nasaun ninia. Hau hanoin katak situasaun sira hanesan ne'e poder politiku iha area infrastrutura tenke tau atensaun atu fó nia apoiu urjente tanba tempu ne'e ita lahatene agora ne'e loron manas mas iha foho leten ne'e nakukun ona se orsida mota tun fali oinsá se orsida obras publika la fó apoiu nee oinsá¨, nia afirma.
Nia la halo kritiku maibé ida ne'e apelu deit katak poder politiku iha Nasaun ne'e tenke tau atensaun bá situasaun ne'e tanba infraestrutura iha naze Naval Hera ne'e Nasaun no Povo nian sosa ho ruin no o ran.
¨Iha tinan rua nulu ita nia Estadu ita nia Governu lakon osan barak agora bá ita hotu hotu ne'ebé servidor Estadu servidor da Nasaun ita idak idak tenke atensaun iha ita idak idak nia papel atu haree bá kestaun sira hanesan ne'e. Ita agora iha faze konstrusaun Estadu. Ami la'os ejize, ami la hirus, ami nia kilat hotu no labarik sira nia ropa inklui sasan hotu bá para hotu iha tasi,¨nia dehan.
Xefe Brigada IGEADI Dili Antonio Sarmento, hateten, ¨ IGEADI sempre fó apoiu bá se se deit mak hetan inundasaun tantu atu iha Dili no Munisípiu sira .
¨ Ita nia Komponente Naval ami fó ona ekipamentu pezadu rua hodi normaliza mota, maibé aban ami sei apoiu tan Bludoser rua para supa tiha sedimentasaun sira ne'ebé mak iha ne'e.
Media F-FDTL
