Unidade Apoiu Servisu FALINTIL-FDTL Ohin Realija Ezersísiu Lao Ain Husi Fatuahi To’o Baze Metinaro

Metinaro, 28 Marsu 2025

FALINTIL-Forsa Defeza Timor-Leste (F-FDTL) liuhusi Unidade Apoiu Servisu ohin realija Ezersísiu lao ain ho distansia kilometru rua nulu resin ida (21) husi Fatuahi to’o baze Unidade Apoiu Servisu (UAS) Metinaro.

Iha intervista Komandante Unidade Apoiu Servisu (UAS) Major Infantaria Horácio dos Santos hateten, atividade ida ohin dader ami hala’o ne’e, bolu dehan ezersísiu Marsa Forsada kada tinan ita nia militár sira sempre realija, alende ne’e mós hola parte iha ami Unidade Apoiu Servisu nia matrix planeamentu kada tinan, ne’ebé ohin maka ami nia Unidade realija marsa ida ne’e.

“Objetivu prinsipal husi Ezersísiu lao ain ida ne’e mak iha vertentes tolu maka ami konsidera, primeiru, ami hakarak teste kapasidade protindaun Militár sira nian, ita persija estadu fisíku Forsas sira nian, nomós sira nia mentalidade,abilidade no matenek, ida ne’e ita halo wainhira estadu atribui misaun ruma bá Forsas Armadas atraves husi ami nia komandu, ami unidade ida ne’e pronto ona para atu asumi misaun ne’ebé ami simu husi komandu, ida seluk maka halo familiarijasaun ho komunidade lokal sira maibé importante liu maka familiarija ho tereinu, oinsá ami nia soldadu sira bele konese jona sira ne’e, ida seluk ami halo hodi refleksaun bá Jornada FALINTIL sira nian, tamba ida ne’e maka ami Unidade Apoiu Servisu hatudu bá povu Timor-Leste katak ami prontu ona kumpri kualker misaun saida deit maka iha ita nia rai”.

Nia hatutan, total bá militár sira ne’ebé ohin lao ain ne’e hamutuk 105 maka halo ezersísiu ida ne’e, ami iha efetivu liu ida ne’e maibé tamba ami nia membru balun halo hela seguransa iha Unidade no balun kumpri hela misaun, ami sira iha ne’e maka ohin halo ezersísiu ida ne’e, tenik nia

Entretantu ezersísiu ida ne’e hahu husi Fatuahi no termina iha baze Unidade Apoiu Servisu (UAS) metinaro, ho distansia 21 kilometru.

Media F-FDTL