Xefe Gabinete CEMGFA Partisipa Iha Serimónia Simu Membru Foun Grupo ESHANA-UNTL 2026

UNTL, 08 Maiu 2026

Reprejentante Xefe Estadu Maior Jenerál FALINTIL-Forsa Defeza Timor-Leste (F-FDTL) Tenente Jenerál Falur Rate Laek, ne'ebé reprejenta husi Xefe Gabinete Koronel Marcelino Ximenes "RIZAI" Partisipa Iha serimónia simu membru Foun grupo Estudante Hadomi Natureza (ESHANA-UNTL) tinan 2026, atividade ne'e hala'o iha Salaun UNTL, Kaikoli, Dili.

Loron importante serimónia ofisiál atu simu membru foun bá tinan 2026 ho tema “Mehi Ida, Objetivu Ida: Hamutuk Salva Ita-nia Natureza”. Atividade ne’e realiza ho partisipasaun husi reprezentante Universidade Nasionál Timor Lorosa’e, estrutura organizasaun, konvidadu sira no kandidatu membru foun.

Iha diskursu Xefe Estadu Maior Jenerál F-FDTL Tenente Jenerál Falur Rate Laek nian ne'ebé le husi Xefe Gabinete Koronel Marcelino Ximenes "RIZAI" hatete katak, organizasaun ESHANA-UNTL ne’e la’ós de’it atividade formal, maibé mós momentu importante atu hametin kompromisu foin-sa’e sira hodi sai lian bá natureza no proteje ambiente iha Timor-Leste.Tema ne’ebé lori iha programa ne’e reflete esperansa no unidade entre juventude sira atu hamutuk halo mudansa pozitivu bá natureza no komunidade.

Hatutan tan katak Timor-Leste presiza jerasaun foun ne’ebé prontu atu servisu no foti asaun konkretu atu proteje biodiversidade, kuida maromak nia natureza no hamenus problema lixu no degradassaun ambiental. Nia mós enfatiza katak, tasi no ai-laran mak riku-soin Nasionál ne’ebé tenke preserva bá jerasaun tuir mai.

Mensagem espesial mós fó bá kandidatu membru foun sira atu komprende katak natureza importante tebes bá moris ema nian.

“Natureza la presiza ema atu nia moris, maibé ita ema mak presiza natureza atu moris,” hanesan liafuan motivasaun ne’ebé hato’o iha serimónia ne’e.

Programa ne’e remata ho deklarasaun ofisiál abertura Rekrutamentu Membru Foun ESHANA-UNTL 2026 ho espírito ekolójiku no unidade. Organizasaun konvida juventude hotu atu kontinua kontribui hodi “hamutuk salva ita-nia natureza” bá futuru Timor-Leste ne’ebé matak no sustentável.

Media F-FDTL