Xefe Gabinete CEMGFA Partsipa Inagurasaun Estatua Saudozu "SOFRE" Iha Alas Manufahi

Manufahi Alas,11 Setembru 2025

Xefe Estadu Maior Jenerál Forsa Armada Tenente Jenerál Domingos Raùl "Faur Rate Laek" Reprejenta husi Xefe Gabinete Xefe Estadu Maior Jenerál Koronel Marcelino Ximenes "Rizai" partisipa iha Serimónia Inagurasaun Estatua Saudozu Veteranu Augosto Fernandes"Sofre" iha Postu Admiminstrativu Alas, Munisípiu Manufahi.

iha Intervensaun Xefe Estadu Maior Jenerál Liu husi Xefe Gabinete hatete, momentu ohin la'os deit serimónia bá inagura estatua maibé atu halo mós rekonesimentu públiku bá moris ne'ebé dedika liberdade, dignidade no integridade Nasaun nian.

"Ho respeitu no gratidaun ne’ebé kle’an, ita halibur ohin bá inagurasaun Estatua Veteranu Augusto Fernandes, ne’ebé koñesidu ho naran “Sofre”. Okaziaun ohin nian la’ós de’it serimónia atu harii estátua iha fatin públiku, ida-ne'e atu komemora rekoñesimentu públiku bá moris ida ne'ebé dedika bá liberdade, dignidade, no integridade ita-nia nasaun nian".

"Ha’u-nia kompatriota Augusto Fernandes moris iha jerasaun ida ne’ebé kompriende katak liberdade la’ós hetan eransa, maibé hetan liu-husi sakrifísiu, korajen, no kompromisu koletivu, Iha nia moris tomak, nia hatudu ho ezemplu katak atu defende rai-doben la'ós de'it presiza aten-barani iha kampu funu nian, maibé mós reziliénsia, dixiplina, no lealdade ba valór sira ne'ebé maka subjasente ba ita-nia identidade nasionál".

"Ohin, ita hanoin nia kontribuisaun ba libertasaun nasionál,Nia la'o hamutuk ho ema barak ne'ebé, liuhosi sakrifísiu, hetan direitu ba autodeterminasaun,sai posivel ba ita-nia povu, hasoru perigu oin-oin, no mantein esperansa maski iha momentu nakukun laran,Ninia servisu, tantu liu husi organizasaun, mobilizasaun sívika, apoiu komunidade, ka kooperasaun entre forsa populár sira kontribui ba ita-nia liberdade".

"Fatin ida-ne'e mós nu'udar espresaun ida bá ita hotu-nia agradesimentu bá família sira ne'ebé apoia, ho pasiénsia no sakrifisiu, luta bá liberdade,Ita hotu hein katak espasu ida-ne'e sai pontu enkontru entre pasadu no futuru, fatin ne'ebé foin-sa'e sira bele rona istória rezisténsia nian, komprende liberdade nia folin, no realiza katak dame mak rezultadu husi opsaun sira ne'ebé ita hili ho responsavel, kooperasaun entre instituisaun sira, no firmeza husi valór sira ne'ebé halibur ita nu'udar povu".

"Ikus liu Obrigadu bá inisiativa husi família. Hau rekomenda atu autoridade Munisípiu no postu administrativu tau matan no dignifika fatin ida ne'e hanesan património Postu Administrativu Alas nian"Remata.

Partisipa iha Serimónia ne'e Xefe Gabinete CEMGFA, Autoridade Munisípiu Manufahi, PNTL Manufahi, APA Alas, Entidades husi Munisípiu Manufahi, Komunidades Alas, xefe suku sira inklui ho Família Saudozu Refere.

Media F-FDTL

Bonifácio Mendonça