Adido Defeza Timor-Leste Iha Indonésia Partisipa Enkontru (Café Dader) Ne’ebé Organiza Husi Ministériu Defeza Indonésia

Jakarta, 29 Juñu 2026

Adido Defeza Timor-Leste iha Indonésia Koronel Renilde Guterres Corte Real e Silva, akompaña husi Adjunto Adido Defesa 2ºTen. Fuzileiros João da Silva Soares, partisipa iha enkontru Coffee Morning (café dader), ne’ebé organiza husi Ministériu Defeza Indonésia iha edifísiu Urip Sumoharjo Ministériu Defeza, Jakarta.

Atividade kafe dader ne’e lidera husi Diretór Jerál Estratéjia Defeza Ministériu Defeza nian, Major Jenerál Bagus Suryadi Tayo no akompaña husi ninia estrutura tomak no hetan partisipasaun husi Adidu Defeza husi Nasaun sira ne’ebé akreditadu iha Indonésia, inklui Timor-Leste.

Atividade ida ne’e sai hanesan mekanizmu ida hodi hametin komunikasaun no kooperasaun, no promove diplomasia Defeza nian entre Ministériu Defeza Indonésia ho Adidu Defeza sira hodi hametin parseria Defeza iha dinámika ambiente estratéjiku globál nia leet.

Iha Oportunidade hanesan Diretór Jerál estratezia Defeza hato’o mós ninia apresiasaun ba kontribuisaun adidu defeza sira hodi kontinua hametin relasaun defeza ho Indonézia.

Nia subliña importánsia hosi konfiansa mutua, diálogu, no diplomasia defeza nian sai hanesan fundamentu ida hodi rezolve dezafiu sira seguransa globál nian.

Durante atividade ne’e parte husi Ministériu Defeza Indonésia nian mós halo apresentasaun kona-ba industria Defeza Indonesia nian ne’ebé suporta no apoia iha Defeza Nasionál no kresimentu ecknómia Indonésia.

Adidu Defeza ho Adjunto marka prezensa iha atividade ne’e hanesan reprezentante ofisiál husi F-FDTL no Ministériu Defeza hodi kontinua hametin kooperasaun iha área Defeza entre Timor-Leste ho Indonesia no rejional, liu husi halo interasaun ho ofisial sira husi Ministériu Defeza Indonesia no TNI, troka Hanoin ho Adidu Defeza sira husi nasaun seluk, no hametin rede komunikasaun entre reprezentante diplomatiku Militár sira.

Partisipasaun iha programa ida ne’e konsidera importante tebes hodi Hametin amizade no konfiansa entre Timor-Leste no Indonesia, Suporta diplomasia Defeza Timor-Leste iha rejiaun, kria ambiente favorável ba dezenvolvimentu kooperasaun Defeza iha futuru, no Haforsa komunikasaun direta entre F-FDTL ho Ministériu Defeza Indonesia no TNI.

Partisipasaun Adidu Defesa Timor-Leste iha Kafé Dader organizadu husi Ministério da Defesa Indonesia ida ne’e importante tebes atu hametin diplomasia Defeza no máximiza relasaun amizade ho Indonézia no nasaun sira seluk, no kontribui ba esforsu hamutuk atu promove paz, estabilidade no seguransa iha rejiaun Sudeste Aziátiku.

Ekipa Média F-FDTL

Adjunto adidu defeza

2ºTen. Fuzileiro João da Silva Soares