Adido Defeza TL Bá Indonésia Partisipa Iha Serimónia Hand Over Servisu Responsavel ASEAN Military Ready Group (AMRG) On Humanitarian Assistance Disaster Relief (HADR)
Jakarta, 08 Maiu 2026
Depois de Timor-Leste sai membru ASEAN Iha Outobru 2025, Hanesan parte hosi diplomasia defesa no fortalesimentu relasaun kooperasaun rejionál, Adidu Defesa Timor-Leste bá Indonésia koronel Renilde Guterres Corte Real e Silva akompaña husi Adjunto Adido Defesa 2Ten. Fuzileiro João da Silva Soares, partisipa iha serimónia Hand Over servisu husi AMRG on HADR nian husi Adidu Defesa Malaysia iha Indonésia, Brigadeiro Jenerál Dari’ Azrin bá iha Adidu Defesa Filipina iha Indonésia Kolonel Emerson Santos, hodi sai responsavel AMRG on HADR nian bá periodu Tinan 2026, ne’ebé realiza iha sentru AHA, Jakarta. Kada Tinan Responsavel sempre troka ou rotativa no posilidade sei hetan mós responsavel husi Timor-Leste bá AMRG on HADR iha Futuru mai.
Sentru Koordenasaun ASEAN bá Asisténsia Umanitária kona-bá jestaun dezastre (Sigla English AHA) nu’udar organizasaun intergovernamentál ida ne’ebé estabelese iha Tinan 2011 hosi Estadu membru ASEAN sira.Baze iha Jakarta, Indonézia, hodi fasilita kooperasaun no koordenasaun rejionál bá jestaun dezastre, ho objetivu atu hadi'a velosidade hodi resposta bá dezastre, no solidariedade iha Sudeste Aziátiku tomak.
Atividade ne’e organiza hanesan mekanizmu kontinuidade lideransa no koordinasaun entre reprezentante defesa no Militár sira iha estrutura kooperasaun ASEAN, liu-liu iha área resposta bá dezastre, fó asisténsia umanitária no seguransa rejionál.
Partisipa iha serimónia ne’e mak Adidu Defesa Timor-Leste ho Adjunto, Adidu Defesa ho estrutura hosi Nasaun Sudeste Aziatiku sira, no Diretór Ezekutivu Lee Yam Ming no Ofisiál sira hosi sentru AHA
Objetivu hosi partisipasaun Adidu Defesa Timor-Leste maka hanesan, Haforsa relasaun diplomátika no kooperasaun defesa no Militár ho Nasaun sudeste aziatiku sira, Aumenta komunikasaun no rede servisu entre Adidu Defesa sira iha rejiaun, Aprezenta komitmentu Timor-Leste atu apoiu estabilidade no seguransa rejionál, Aprende no partilla esperiénsia kona-bá koordinasaun resposta emerjénsia no asisténsia umanitária, ikus Liu Haforsa koperasaun entre Timor-Leste ho instituisaun rejionál hanesan ASEAN.
Serimónia hahú ho liafuan boas-vindas hosi Diretór ezekutivu sentru AHA, apresenta mós misaun no vizaun AMRG on HADR nian, ne’ebé hateten importância kooperasaun entre Nasaun ASEAN sira iha área defesa (Militár)no asisténsia umanitária.
Iha oportunidade hanesan, Adidu Defesa hosi Malaysia entrega oficialmente responsabilidade servisu no koordinasaun bá Adidu Defesa Filipina hanesan parte hosi mekanizmu rotasaun servisu Adidu Defesa iha estrutura kooperasaun ASEAN iha Jakarta, Indonésia.
Durante atividade ne’e, Adidu Defesa sira sudeste aziatiku halo diskusaun informal kona-bá mekanizmu resposta emerjénsia rejionál; interoperabilidade entre instituisaun defesa sira; kooperasaun iha área treinamentu no kapasidade institusionál; importânsia solidariedade no unidade ASEAN ne’ebe ho motto “ ONE ASEAN ONE RESPONSE.“ no hala’o mós vizita bá iha sala integradu Sentru AHA nian, hodi observa no hare direta sistema monitorizasaun ho meius elektroniku bá iha dezastre naturais sira iha nasaun sudeste aziatiku nian.
Adidu Defesa Timor-Leste utiliza oportunidade ne’e atu haforsa relasaun ho parseiru defesa sira no promove imajen pozitivu Timor-Leste nian iha ambiente diplomátiku no Militár rejionál.
Partisipasaun Adidu Defesa ho Adjunto iha serimónia Hand Over ida ne’e hanesan reprejenta komitmentu Timor-Leste atu kontinua envolve ativamente iha esforsu kooperasaun defesa no Militár bá asisténsia umanitária iha rejiaun ASEAN.
Atividade ne’e konsidera importante Tamba kontribui bá fortalecimentu relasaun diplomátika no hadi’ak entendimento entre instituisaun defesa sira iha Sudeste Aziátiku, no mós fó oportunidade bá Timor-Leste atu kontinua aprende no adapta boas práticas iha área resposta emerjénsia no seguransa rejionál.
Media F-FDTL
Adjunto Adido Defesa Timor-Leste bá Indonésia 2 Ten Fuzileiro João da Silva Soares
