Adidu Defesa Timor-Leste Partisipa Iha Planeamentu Final Ezersisíu Super Garuda Shield 2026 Iha Jakarta

Jakarta, 22 Maiu 2026 

Adidu Defesa Timor-Leste iha Indonésia, Koronel Renilde Guterres Corte Real e Silva, akompaña husi Adjunto Adidu Defesa, 2ºTen. Fuzileiro João da Silva Soares, partisipa iha Konferénsia Planeamentu Final ba Ezersísiu Super Garuda Shield 2026, ne’ebé realiza iha Cibubur, Jakarta Timur, Indonésia.

Exercísiu Super Garuda Shield Ida ne’e hanesan Ezersisíu Militár multilateral bo'ot ida ne’ebé organiza hamutuk husi Tentara Nasionál Indonésia (TNI) no United States Indo-Pacific Command, ho objetivu atu hametin kooperasaun defesa no seguransa iha rejiaun Indo-Pasífiku. Ezersísiu ida-ne’e kontinua sai hanesan plataforma estratéjika ida atu promove interoperabilidade, hasa’e kapasidade operasionál no kombate, no reforsa relasaun diplomasia militar entre nasaun participante sira.

Partisipasaun Adidu Defesa iha prosesu planeamentu Ezersisíu ne’e hatudu komitmentu F-FDTL no Timor-Leste hodi haforsa relasaun ho parseiru defesa sira no promove imajen pozitivu F-FDTL no Timor-Leste nian iha ambiente diplomátiku no militar rejionál, hodi kontribui bá estabilidade no seguransa rejionál.

Antes partisipa iha konferensia Planeamentu final, Adidu Defesa partispa moys iha Konferénsia Planeamentu Inisiál iha Fevereiru 2026, iha Tangerang, no Konferénsia Planeamentu Médiu iha Abril 2026, iha Jakarta.

Partisipasaun iha Konferénsia Planeamentu Final ida ne’e sai hanesan etapa importante ikus atu asegura preparasaun exercísiu ne’e lao ho susesu, efisiente no seguru.

Objetivu prinsipal husi Ezersísiu Super Garuda Shield 2026 mak hodi hametin interoperabilidade entre forsa armada nasaun partisipante sira, hasa’e preparasaun operasionál no kapasidade kombate, reforsa kooperasaun seguransa iha rejiaun Indo-Pasífiku, desenvolve kapasidade komandu no kontrolu multilateral, harii konfiansa mútua no relasaun diplomátika militar entre parseiru sira.

Ezersísiu ida-ne’e envolve partisipasaun husi nasaun no parseiru estratéjiku oioin, hanesan Indonézia, Estados Unidos, Austrália, Japão, Singapura, Coreia do Sul, Reino Unido, Canadá, França, Nova Zelândia, no Timor-Leste mos marka prezensa hanesan observadór iha iniciativa importante ida-ne’e.

Ezersísiu Ida ne’e sei realiza hahu iha loron 31 Agostu no termina iha 11 Setembru 2026, exercísiu ne’e sei hala’o iha fatin treinamentu militar balun iha Indonézia hanesan Baturaja, Lampung, Jakarta no Bandung, nomós iha área apoiu operasionál sira seluk.

Super Garuda Shield 2026 konsidera hanesan símbolu importante ida ba estratéjia defesa Indo-Pasífiku, tanba kontribui ba preparasaun militar multilateral, liberdade navegasaun marítima, prevensaun ameasa transnasionál no konflitu rejionál, no manutensaun estabilidade no paz iha rejiaun.

Bá Timor-Leste, partisipasaun iha exercísiu ne’e fó benefísiu estratéjiku lubuk ida, liuliu oportunidade atu aprende mekanismu interoperabilidade militar ASEAN no Indo-Pasífiku, hasa’e kooperasaun defesa ho parseiru internasionál sira, observa padraun operasionál modernu, no reforsa kapasidade F-FDTL nian atu responde ba dezastre naturais no operasaun manutensaun paz iha nivel rejionál no internasionál.

Partisipasaun ativa Timor-Leste iha prosesu planeamentu Ezersísiu Super Garuda Shield 2026 Ida ne’e, reafirma komitmentu Timor Leste nian hodi kontinua hametin relasaun defesa ho parseiru internasionál sira no kontribui ba paz, estabilidade no seguransa iha rejiaun Indo-Pasífiku.

Media F-FDTL

Adjunto Adido Defesa Timor-Leste bá Indonésia 2Ten Fuzileiro João da Silva