Adjunto Adido Defeza Indonésia Halo Sorumutu Ho Xefe Estadu Maior Jenerál F-FDTL

Kuartel Jenerál, 21 Abril 2026

Komandu FALINTIL-Forsa Defeza Timor-Leste (F-FDTL) liuhosi Xefe Estadu Maior Jenerál F-FDTL Tenente Jenerál Falur Rate Laek, ohin simu vizita kortezia husi Adjunto Adido Defeza Tentara Nasionál Indonésia (TNI) Mayor Marinir Dwi Martono, iha Kuartel Jenerál F-FDTL, Fatuhada, Dili.

Sorumutu ne’e realiza atu halo despedida, tanba mandatu Mayor Marinir Dwi Martono nian iha Timor-Leste remata ona.

Iha okaziaun ne’e mós, nia aproveita tempu atu introdus ofisiál foun ne’ebé sei kontinua kna'ar nu’udar Adjunto Adido Defeza iha Timor-Leste maka Mayor Laut (P) Muhammad Alfa Desdiano Kusuma.

Durante enkontru ne’e, parte rua diskuti kona-bá relasaun kooperasaun Teknika Militár entre Timor-Leste no Indonézia, ne’ebé durante ne’e la'o di’ak no kontribui bá estabilidade no dame iha rejiaun.

Tenente Jenerál Falur Rate Laek mós hato’o apresiasaun bá kontribuisaun ne’ebé Mayor Marinir Dwi Martono halo durante nia servisu, nomós reprezentante foun.

Vizita ne’e refleta kompromisu kontinua husi Nasaun rua nian atu hametin relasaun defeza no kooperasaun bilateral iha futuru.

Media F-FDTL

Sargento Carceres