Adjunto Xefe Estadu Maior F-FDTL Ensera Formasaun Sistema Informasaun Geográfika (GIS)-ArcGIS Pro Básiku
Kuartel Jenerál, 30 Abril 2026
Adjunto Xefe Estadu Maior F-FDTL Koronel Tirosionado Mario Baptista Bersama, ohin halo enseramentu ofisial bá kursu formasaun Sistema Informasaun Geográfika (GIS) – ArcGIS Pro Básiku, iha salaun auditoriu Kuartel Jenerál F-FDTL, Fatuhada, Dili.
Iha Diskursu Adjunto Xefe Estadu Maior F-FDTL Koronel Tirosionado Mario Baptista Bersama hateten, formasaun ida ne’e importante tebes bá iha komandu F-FDTL, ita atu dezenvolve hola parte mós hasa’e ita nia konesimentu liliu iha mapamentu ninian no bele fasilita ita nia Militár sira bele produs mapa ida ne’ebé maka bele dehan katak mais modernu no atualijadu, nune’e bele ona kapasita ita nia membru sira husi Komponente no Unidade, bá futuru ita iha rekursu ne’ebé maka ita bele dehan katak sufisiente, bá oin ita mós sei hanoin, hanesan ohin formandus sira hato’o ona futuru ita sei loke tan formasaun avansadu ne’ebé ho durasaun naruk, hau hanoin ida ne’e nesesariu tebes bá komandu F-FDTL.
Alende ne’e nia mós husu bá formandus sira ne’ebé mak ohin simu sertifikadu liliu bá ofisiais, sargenton no prasas sira atu kontinua aprende nafatin iha futuru.
“ Bá imi formandus sira hau husu, formasaun ida ne’e importante bá imi, labele haluha ne’e hanesan abilidade ida bá ita bo’ot sira, kontinua estuda nafatin, buat ida estuda ne’e la hotu bá ita, ne’e hola parte hanesan siensia Militár, ne’ebé ita estuda to'o nivel ida ne’ebé mak ita atinje, tamba agora teknolojia ne’e sempre iha mudansa, tamba ne’e mak imi Militár sira tenke buka no aprende atualija nafatin imi nia konesimentu entermus siensia Militár nian.
Entertantu formasaun ida ne'e nia finalidade maka atu hasa'e kapasidade formandos sira iha utilizasaun aplikasaun ArcGIS Pro, hodi halo análise, jere dadus espaciais no produz mapa topográfiku Militár nian, formasaun ne'e hala'o durante loron sanulu resin ha’at (14) kompostu husi Komponente nomós Unidade sira iha F-FDTL.
Media F-FDTL
Izidor Lopes
