Xefe Estadu Maior Jenerál F-FDTL Asiste Direta Jogu Amizade Entre F-FDTL Ho Forsas Armadas Austrália

Brisbane, 18 Outubru 2025

Xefe Estadu Maior Jenerál FALINTIL-Forsa Defeza Timor-Leste (F-FDTL) Tenente Jenerál Falur Rate Laek asiste direta Jogu amizade entre F-FDTL ho Forsas Armadas Austrália nian iha kampo Baze Militár Forsas Armadas Austrália iha Brisbane.

Iha inisiu jogu arbitru fó sinál, ekipa rua lansa kedas kontra atake bá malu tu’ir tatika no estratejia treinador orienta nia jogador sira atu hetan rezultadu maximu.

Ekipa rua hala’o jogu ho ritmu ne’ebé as, maibé ekipa F-FDTL ne’ebé hala’o jogu agresivu, ho bola ne’ebé husi ain bá ain, ho ambisaun hodi bele produz golu, maibé liña defeza Austrália ne’ebé solidu no la fó opurtunidade bá nia adversariu atu realiza golu iha estadiu Brisbane Austrália.

Ekipa F-FDTL Timor-Leste ne’ebé lansa kontra atake ne’ebé lais, halo liña defensivu selesão Forsa Austrália tenke gasta enerjia hodi bele hamate liña avansadu F-FDTL Timor-Leste nian.

Iha minutu 23 Ekipa husi F-FDTL hetan opurtunidade atu marka golu aproveita fallansu jogador defeza adversáriu, maibé la konsege, ho opurtunidade ne’ebé F-FDTL hetan liuhusi lansa bola kantu, jogadór Kevin Fernandes ho numeru kamizola 7 konsege fura guarda rede Forsa Austrália nian hodi lidera jogu no iha minutu 33 Aumenta golu husi jogadór Kevin Fernandes ho numeru kamizola 7 iha primeira parte ho rezultadu 2-0 to’o primeira parte termina.

Hakur bá segunda parte ekipa F-FDTL Timor-Leste lansa atake ne’ebé agresivu, nune’e halo presaun bá ekipa seleção Forsa Austrália liuhusi liña mediu parte los, hodi lansa suta maibé seidauk kona alvu tanba defeza F-FDTL antisipa bola ho diak.

Ekipa rua halo kontra atake bá malu hodi hadau malu opurtunidade atu aumenta golu no responde golu, maibé la konsege, tanba esforsu hirak ne’e seidauk kona nia alvu.

Iha minutu 87 jogador husi ekipa F-FDTL konsege aumenta tan golu bá 3-0 liuhusi jogadór numeru kamizola 77. Golu refere mantein to’o jogu termina.

Maske sofre golu 3 ekipa Segundu Divizaun Forsa Austrália kontinua halo kontra atake hodi bele responde golu ruma, maibé liña defeza F-FDTL Timor-Leste mantein solidu to jogu segunda parte termin ho Skor 3-0 no Ekipa F-FDTL hetan 3 lugar.

Entretantu iha Jogu amizade refere Ekipa Femenina no Mane F-FDTL okupa Hotu iha 3 lugar, tuir orariu Ekipa sei fila hikas mai Timor-Leste iha Aban.

Iha jogu Amizade entre F-FDTL ho Forsa Austrália ne'e hetan Partisipasaun husi Xefe Estadu Maior Jenerál FALINTIL-Forsa Defeza Timor-Leste (F-FDTL), Tenente Jenerál Domingos Raul "Falur Rate Laek" inklui Ofisias husi F-FDTL.

Media F-FDTL

Izidor Lopes