Ekipa Komunikasaun D6 Instala Kámera sira iha Kuartél Jerál
Divizaun Komunikasaun no Sistema Informasaun (DIVCSI), liuhusi Ekipa D6, foin lalais ne’e monta kamera vijilánsia iha Kuartél Jerál FALINTIL-FDTL iha Fatuhada, Dili.
Inisiativa ida-ne'e halo parte iha planu hodi reforsa medida sira seguransa nian no kontrolu ba perímetru kuartél nian, hodi garante protesaun boot liu ba infraestrutura militár sira no monitorizasaun di'ak liu ba área sira ne'ebé sensivel.
Ho instalasaun kámara sira, sai posivel atu monitoriza asesu no movimentu sira iha kompleksu militár nia laran iha tempu reál, hodi kontribui ba seguransa pesoál sira nian no protesaun patrimóniu F-FDTL nian.
Projetu ne’e halo parte iha esforsu ne’ebé la’o daudaun atu moderniza sistema komunikasaun no seguransa FALINTIL-FDTL nian, hodi garante kondisaun adekuada ba protesaun ba nia unidade no instalasaun sira.
