Dili, 12 Novembru 2026
Xefe Forsa Defeza Nasionál Reinu Tailándia, Jenerál Ukris Boontanondha, hamutuk ho nia delegasaun, fila hikas ba Tailándia hafoin remata vizita servisu durante loron rua iha Timor-Leste, hahu husi loron 10 to’o 12 Novembru 2026.
Durante vizita iha Timor-Leste, Jenerál Ukris Boontanondha no delegasaun hala’o programa vizita ofisiál ba instituisaun sira FALINTIL-Forsa Defeza Timor-Leste (F-FDTL), inklui hasoru malu ho lideransa Governu sira no estrutura komandu F-FDTL, atu hametin relasaun kooperasaun no amizade entre forsa defeza nasaun rua.
Molok hakat ain ba aviaun atu fila ba Tailándia, reprezentante Xefe Estadu-Maior Jenerál F-FDTL, ne’ebé mós nu’udar Komandante Komponente Naval, Komodoro Higino das Neves Superman, hamutuk ho nia espoza no estrutura komandu F-FDTL, marka prezensa atu hala’o serimónia despedida ba Jenerál Ukris Boontanondha no nia delegasaun iha Aeroportu Internasionál Prezidente Nicolau Lobato, Díli.
Serimónia despedida ne’e reprezenta sinál respeitu, amizade no relasaun di’ak entre F-FDTL no Forsa Defeza Nasionál Reinu Tailándia.
Ho remata vizita ofisiál ida-ne’e, espera katak relasaun kooperasaun no amizade entre Timor-Leste no Tailándia sei kontinua hametin liután, liuliu iha área defeza no seguransa, ba interese no benefísiu hamutuk ba nasaun rua.
Média F-FDTL
Ave. Nicolao Lobato, Fatuhada
Comoro, Dili, Timor-Leste
Tel: +670 78156312
Email: info@fdtl.mil.tl