Baucau, 11 Novembru 2026
Xefe Estadu Maior Jenerál Forsas Armadas Reino Tailándia, Jenerál Ukris Boontanondha, hamutuk ho nia delegasaun, kontinua hala'o vizita bá Komponente Terrestre no Komponente Aérea FALINTIL-Forsa Defeza Timor-Leste (F-FDTL) iha Munisípiu Baucau.
Iha vizita ofisiál bá Komponente Terrestre delegasaun husi Tailándia simu direta husi Komandante Komponente Terrestre, Koronel Domingos da Costa Soares "Dobu", hamutuk ho estrutura komandu no membru sira husi Komponente Terrestre.
Delegasaun simu ho serimónia guarda-honra husi membru Forsa Komponente Terrestre, nu'udar forma respeitu no honra bá vizita ofisiál husi Xefe Estadu Maior Jenerál Forsas Armadas Reino Tailándia no nia delegasaun.
Rekorda fali katak, iha tinan 24 liubá, Jenerál Tailándia ne'e mós iha kontribuisaun bá Misaun Paz iha Timor-Leste, iha aréa jurídiku Munisípiu Baucau no Partisipasaun ne'e sai parte ida husi istória prezensa no kontribuisaun Tailándia bá prosesu manutensaun Paz no estabilidade iha Timor-Leste.
Nune'e, vizita ofisiál ne'e mós iha valor istóriku, tanba fó oportunidade atu fila fali haree fatin ne'ebé iha ligasaun ho prezensa no kontribuisaun Thailándia iha pasadu, no hametin tan relasaun amizade entre Forsa Defeza Nasaun rua.
Durante vizita, delegasaun hetan oportunidade atu hare direta infraestrutura, fasilidade no atividade sira ne'ebé hala'o iha Komponente Terrestre, no rona esplikasaun kona-bá kna’ar, responsabilidade no estrutura organizasionál husi komponente ne'e.
Iha fatin hanesan delegasaun mós kontinua halo vizita bá Komponente Aérea F-FDTL atu haree infraestrutura, fasilidade no kapasidade komponente nian, hanesan parte husi programa vizita ofisiál iha Munisípiu Baucau.
Vizita ofisiál ne'e iha objetivu atu hametin relasaun amizade no kooperasaun bilaterál entre Timor-Leste no Reino Thailándia, liuliu iha área defeza no seguransa, hodi buka oportunidade bá dezenvolvimentu kapasidade no kolaborasaun iha futuru.
F-FDTL kontinua hametin relasaun kooperasaun ho Nasaun parseiru sira, hodi promove troka esperiénsia, dezenvolvimentu kapasidade no profisionalizmu institusionál iha área defeza no seguransa.
Média F-FDTL
Alferes Pio Sargento, Carceres & Bonifaçio Mendonça
Ave. Nicolao Lobato, Fatuhada
Comoro, Dili, Timor-Leste
Tel: +670 78156312
Email: info@fdtl.mil.tl