Comandante Componente Naval Halo Formatura Geral Ba Primeira Semana Fulan Juñu Nian Iha Baze Naval Hera

Hera, 01 Juñu 2026

Comandante Componente Naval, Comodoro Higino das Neves “SUPER-MAN”, halo Formatura Geral ba semana dahuluk fulan Juñu nian iha Baze Naval Hera.

Serimónia ne’e partisipa husi comandante unidade sira, assessor Portugal no Austrália, ofisiais, sargentu, prasa sira no familia Componente Naval.

Iha serimónia ne’e mos realiza leitura Ordem Servisu Comandante Componente Naval nian kona-ba movimentasaun no promosaun militar sira. Liuhusi ordem servisu ne’e, militar balun transfere husi unidade anterior ba unidade foun atu assume knaar no responsabilidade foun tuir nesesidade servisu institusionál. Alende ne’e, realiza mos promosaun postu ba membru militar sira ne’ebé hatudu dedikasaun, disiplina no desempenhu di’ak durante sira nia servisu, hanesan forma rekonesimentu ba sira nia esforsu no kontribuisaun ba dezenvolvimentu Componente Naval no F-FDTL.

Comodoro Higino das Neves hato’o agradesimentu ba militar no estrutura Comandu Naval tomak ne’ebé servisu hamutuk ho responsabilidade no espírito koperasaun hodi realiza misaun no atividade sira ho susesu.

Comandante husu ba militar sira atu kontinua mantén disiplina, integridade no profesionalizmu iha servisu, tanba knaar ida-idak ne’ebé hala’o mak kontribui ba defesa soberania nasional no servisu ba povu Timor-Leste. Nia mos lembra katak independénsia Timor-Leste hetan liuhusi sakrifísiu husi asuwain sira, tanba ne’e militar sira tenke servisu ho patriotizmu no kompromisu atu defende nasaun, liu-liu iha área marítima.

Alende ne’e, Komandante Componente Naval husu ba militar sira atu prepara-an ba Konferénsia CPLP iha área seguransa marítima ne’ebé sei realiza iha fulan Jullu, hodi hatudu ba komunidade internasionál katak Timor-Leste iha kapasidade atu organiza no realiza eventu internasionál sira ho padraun profissional.

Ba Segundo Marinheiro sira ne’ebé foin promove, Komandante husu atu simu responsabilidade foun ne’e ho seriedade no kompromisu, hodi sai ezemplu di’ak ba kolega sira no kontribui ba dezenvolvimentu Componente Naval, tenik Comodoro Higino Das Neves “SUPER-MAN”

Media Naval

1º Sargento Garcia