Estrurura Tomak Komandu F-FDTL Presta Omenajem Ikus Bá Komandante Ernestu "DUDU" Iha Kuartel Jenerál
Kuartel Jenerál, 07 Maiu 2025.
Estrutura tomak komandu FALINTIL-Forsa Defeza Timor-Leste (F-FDTL), presta omenajem ikus bá komandante Rejiaun IV Leão Fronteira, Saudozu Ernesto Fernandes "Dudu" iha edifísiu Kuartel Jenerál, Fatuhada, Díli.
Saudozu Ernesto Fernandes 'Dudu' hakotu nia iis, iha loron 07 fulan Maiu 2025, dadeer ne'e, iha Hospital Nasionál Guido Valadares (HNGV).
Iha presta omenajen bá Saudozu, Xefe Estadu Maior Jenerál F-FDTL Tenente Jenerál Falur Rate Laek, iha nia mensajen ikus bá saudozu, Ita halibur iha ne'e ho fuan todan hodi simu Komandante Dudu, ita nia Heroi mai iha Kuartel-Jenerál FALINTIL-FDTL.
Instituisaun ne'ebé ita konsidera mós hanesan nia uma, uma ne'ebé nia kontribui ho kosar be’en, ho sakrifísiu no vida hodi defende atu hari'i iha tempu susar nia laran.
“Komandante Nia aten-brani, dedikasaun, no espíritu serví nian sei grava nafatin iha ita hotu nia memória, liu-liu nia hahalok diak hotu durante nia jornada vida moris, liu-liu fatin sira ne'ebé nia serví bá, Komandante Dudu serví ita-nia Nasaun ho onra, no ninia sakrifísiu garante ita-nia liberdade. Komandante ne'ebé ho nia personalidade notável, nia memória sei sai hanesan farol ne'ebé guia no fó naroman bá ita-nia dalan no inspira ita atu moris ho aten-brani no determinasaun. Nia istória kontinua inspira ita atu sai sidadaun ne'ebé responsável, sidadaun ne'ebé konsiente, sidadaun ne'ebé dedikadu, no liu-liu sai nasionalista no patriota hodi kontribui ba fortalese ita nia independénsia nasionál”.
Tenente Jenerál mós subliña tán, Saudozu komandante nia hahalok diak sira ne'e merese ita hotu nia sentidu gratidaun ba nia legadu ne'ebé nia husik hela, nune'e mós ita hotu nia orasaun no sentidu solidariedade ho família durante tempu susar ida-ne'e.
Xefe Estadu Maior Jenerál F-FDTL informa, Instituisaun oferese nia apoiu tomak bainhira família presiza atu fó onra no dignifika hahalok diak hotu ne'ebé nia husik hela.
Maun Dudu, Maski ita-boot laiha ona, ita-bo’ot nia espíritu sei inspira ami bá nafatin, liu-liu bá oan sira ne'ebé agora serví iha instituisaun ne'ebé nia abut mai husi FALINTIL. Obrigado bá ita-bo’ot nia aten-brani no dedikasaun. Kualidade hirak ne'ebé sei trasmite bá ita nia Militár foin sa'e sira hodi banati tuir espíritu lideransa ne'ebé ita bo’ot husik hela. Hakotu CEMGFA Tenente Jenerál Falur Rate Laek.
Deskansa ho hakmatek no obrigadu barak, Heroi!
Média F-FDTL
