F-FDTL Ho Ministeriu Defeza Halo Reflesaun Selebra Vitória Tinan 2024
Kuartel Jenerál, 28 Dezembro 2024.
Komandu FALINTIL-Forsa Defeza Timor-Leste F-FDTL hamutuk ho Ministeriu Defeza halo reflesaun konjunta, selebra vitória susesu durante vizita internasionais mai Timor-Leste iha tinan 2024.
Xefe Estadu Maior Jenerál FALINTIL-Forsa Defeza Timor-Leste (F-FDTL) Tenente Jenerál Domingos Raúl "Falur Rate Laek" hato'o parabéns bá família nia apoiu tomak ho dedikasaun empenamentu iha tinan 2024 nian laran.
"Ohin ita halo reflesaun hamutuk selebra vitoria susesu seguransa iha tinan 2024, ne'ebé liu ona, la kleur tan ita simu tinan foun 2025 mai, tanba ne'e tinan tuan ne'ebé liu ona sai hanesan esperiénsia di'ak no la di'ak ne'ebé ita halo liu ona, ha'u hein katak ida ne'e sai reférensia atu hadia iha tinan oin mai".
Subliña tan katak, misaun ne'ebé estadu Timor-Leste oferese bá Instituisaun F-FDTL tenki asegura no implementa ho di'ak, maske hasoru defaziu ho konstrajiamentu ho difikuldade, maibé Militár ema ida ne'ebé treinadu ho formasaun sira ne'ebé iha prontu kumpri Ordem hodi halo servisu serbí povu no Nasaun Timor-Leste.
CEMGFA afirma, enkontru konsellu superior defeza seguransa ne'ebé lidera husi Presidente Repúblika José Ramos Horta hato'o apresiasaun parabeniza bá instituisaun F-FDTL bá servisu operasaun ne'ebé apoiu Instituisaun PNTL Asegura seguransa iha vizita amu papa Francisco mai Timor-Leste ho susesu.
"Iha enkontru konsellu superior defeza seguransa ita nia alta entidade nasaun Timor-Leste sira parabéns ita ho apresiasaun di'ak bá ita liu liu operasaun seguransa ne'ebé ita fó apoiu bá PNTL susesu bo'ot tebes ita simu vizita amu papa Francisco mai Timor-Leste la'o di'ak tebes".
Nia Afirma, apresiasaun sira ne'e alta entidade Nasaun Timor-Leste fó parabéns ne'e hanesan kritika ida bá Instituisaun F-FDTL para hadia nafatin sala ne'ebé iha no buat ne'ebé la iha buka atu rezolve no saida mak la halo buka atu halo hotu ida-ne'e mak Importante.
Aleinde ida ne'e, komandante iha Instituisaun F-FDTL ha'u representa sira hotu atu hato'o ami nia deskulpa bá públiku tomak, maibé ha'u mós husu atu iha tinan foun 2025 ne'ebé mai sosiadade sivil ho Komunidade tenki apoiu no kopera di'ak ho Militár para ita ajuda Governu bele dezenvolve ita nia rai halo investimentu ida di'ak atu redus ita-nia difikuldade ekonómia finansial ne'ebé iha ita nia rai laran.
"Ha'u husu bá Militar hotu tempu ida ne'e ita halo reflesaun ba ita ida idak nia aan hadia vida família ho Instituisaun atu ita nia kareira ne'e bele la'o di'ak kontinua hametin relasaun di'ak ho Polísia Nasionál Timor-Leste atu serbí ba povu no nasaun Timor-Leste," hakotu CEMGFA.
Média F-FDTL
