Gratidaun, iha poezia no iha klamar

Ohin ha'u kompleta tinan hitunulu resin ida ezisténsia, jornada naruk ida-ne'e ha'u fó sasin:

moris hanorin ha'u, husi idade ki'ik, katak iha de'it dalan ida ne'ebé dignu: katak manán ho onra.

Desde ha'u nia tempu joven, dedika ha'u nia lian no ha'u nia liman ba kauza boot liberdade ita-nia Pátria nian. Haʼu koñese terus, haʼu tahan susar;

no, bainhira to'o iha idade adulta, ha'u la husik kilat husi dever: Ha’u hola parte, ho fervor hanesan, iha konstrusaun Timor foun.

Ha'u halo ha'u nia moris nu'udar oferta ba rai ida-ne'e. Ha'u luta tanba ha'u hadomi, no domin ba Pátria la hatene deskansa.

Ha’u la hatene ho serteza oinsá ha’u atu serbí Timor-Leste hahú aban ba oin. Maibé se destinu, iha ninia justisa, koresponde ba mehi ne'ebé moris iha nakukun boot kalan naruk nian, entaun ha'u iha esperansa atu haree, iha rai lulik ida-ne'e, buras lolos husi unidade nasionál, rekonsiliasaun ida ne'ebé lolos entre maun-alin sira ne'ebé maka uluk diskordánsia haketak.

Ha’u aspira ba konxiénsia nasionál ida ne’ebé konsagrada, ba moralidade públika ne'ebé kuda no dignu, atu nune’e Timor-Leste bele sai, loron ba loron, di’ak liu fali horisehik.

Ita sei halo nasaun ida-ne'e sai Pátria ida ne'ebé loos, no Pátria ida-ne'e, família ida de'it,

moris iha dame rohan laek Maromak Kbiit-Na’in nian.

Ba hotu-hotu, ha'u hato'o ha'u nia agradesimentu klean no sinseru.