NOTISIA

IGTL.IP Entrega Amostra Riku-Soin Timor-Leste Nian Ba Instituisaun F-FDTL

Media F-FDTL QG Notisia 24 de julho de 2026 Hare na'in: 8 0 minutes read

Kuartél Jenerál, 22 Jullu 2026

Xefe Estadu Maior Jenerál FALINTIL-Forsa Defeza Timor-Leste (F-FDTL) Tenente Jenerál Falur Rate Laek hasoru malu ho Prezidente Instituto Geociências de Timor-Leste e Instituto Público (sigla portugês-IGTL.IP) Eng. Job Brites dos Santos iha nia kna’ar fatin Kuartél Jenerál Fatuhada Dili Kuarta ne’e.

Iha surumutu ne’e prezidente IGTL.IP ho nia ekipa tékniku sira Entrega mós koleksaun amostra geolojiku hanesan mos riku-soin Timor-Leste nian ho modelu fatuk ba Instituisaun FALINTIL-FDTL hodi tau iha salaun memorial Centro Instrusaun Komandante Nikolau Lobato Metinaru parte ida hodi kontinua hametin kooperasaun no fahe konesimentu kona-ba patrimóniu jeolójiku no riku-soin Timor-Leste nian nune’e IGTL mos kompremete kontinua hametin relasaun iha amizade ida metin liu tan.

"Amostra jeolójika sira ne'ebé IGTL entrega ohin laos fatuk babain. Fatuk sira ne’e mak evidénsia siéntífika husi história natural Timor-Leste ne'ebé forma durante miliaun anos atrás. Fatuk ida-idak lori mensajen ida kona-ba oinsá ilha Timor forma, oinsá foho, vale no estrutura rai nian dezenvolve, no oinsá prosesu jeolójiku sira durante tempu naruk mak hamosu rekursu naturál ne'ebé ohin loron sai patrimóniu no potensial importante ba dezenvolvimentu Liu husi amostra sira ne'e, ita bele komprende katak rai ne'ebé ita hamrik ba loron-loron la'ós deit fatin ida atu moris, maibé hanesan "livru ida" ne'ebé hakerek kona ba istória Timor-Leste durante miliaun anos atrás. Bainhira ita aprende lee "livru ida-ne'e", ita sei komprende di'ak liu ita-nia patrimóniu jeolójiku no ita sei prepara di'ak liu atu jere no utiliza rekursu naturál sira ho responsabilidade ba benefísiu jerasaun ohin no jerasaun sira iha futuru"

"ami hato’o agradeseimentu ba lideransa F-FDTL ne’ebé fó oportunidade ba IGTL atu kontribui ba Espasu Edukativu Memorial ida-ne’e. Ami fiar katak parseria entre IGTL no F-FDTL sei kontinua metin ba benefísiu Timor-Leste".

Iha sorin seluk Xefe Estadu Maior Jenerál FALINTIL-Forsa Defeza Timor-Leste(F-FDTL) Tenente Jenerál Falur Rate Laek agradese ba IGTL.IP ho ekipa ne’ebe durante servisu makas hodi halo peskiza sira kona ba amostra geolojiku ho disponibilidade no protidaun ne’ebe hakarak halo koopersaun ho F-FDTL metin liu tan

’’hau agradese ba ita bo’ot sira nia disponibilidade prontidaun ne’ebe hakarak kopera teb-tebes ho F-FDTL ida ne’e reflete ita nia Unidade Nasional hau hein katak ita nia koperasaun ne’e la’o ba oin’’ dehan Xefe Estadu Maior Jenerál F-FDTL.

Ekipa Média F-FDTL

Cabo J' Silva