Intervensaun Despedida Prezidente Francisco Guterres "Lú-Olo" Mai Iha Kuartel-Jenerál F-FDTL

Kuartél-Jenerál, 26 juñu 2026

1. Exelénsias, autoridade sivíl no militár sira hotu iha ne'e,

2. Estimadu Família, Mana Cidália no Oan-Doben sira husi Saudozu Irmaun no Kamarada de Arma Maun Lú-Olo,

3. Família tomak husi Ossú no Atauru.

Loron ohin vizita ikus mai fatin ida-ne'e, ne'ebé sai mós uma simbólika ba FALINTIL, ita despede ita-nia aman, tiu, maun, alin, kamarada no kompañeiru luta libertasaun nasionál.

Ho fuan ne'ebé todan, maibé ho klamar ne'ebé nakonu ho gratidaun mak ha'u dirije ba ita hotu atu fó omenajen ikus ida-ne'e ba figura únika, figura ho karákter, figura ho kualidade hotu-hotu lideransa nian ne'ebé dedika nia moris tomak ba kauza liberdade, dignidade no justisa ba timoroan tomak.

Maun no Kamarada luta na'in, Lú-Olo, ita-boot nu'udar membru fiel no dedikadu ba kuadru partidu FRETILIN, vanguarda polítika ne'ebé lori FALINTIL iha kabaas liu husi ai-laran, foho lolon durante tempu difisil ita-nia rezisténsia nian.

1Durante tinan ruanulu-resin-haat luta naruk no iha prosesu tomak dezenvolvimentu nasionál, ita boot nunka trai ita-nia povu nia konfiansa, nunka lakon esperansa moris diak ba ita nia povu ne'ebe luta loron ba loron hodi dignifika no fó honra ba sira nia an no ba sira nia família.

Reziste no persiste sempre sai ita-boot nia jornada moris. Mesmu hafoin konkista ita nia Liberdade, bainhira ita hanoin katak tempu ona atu deskansa, ita-boot hasoru luta seluk, luta foun ne'ebé diferente no difisil.

Irmaun no kompañeiru da luta, ita-boot ba ho dame tanba moris ho prinsipiu no valores Aswa'in lolos FALINTIL nian. Iha ita nia kabaas, lori naha todan aspirasaun no mehi boot kombatente tomak nian, eroi koñesidu no deskoñesidu sira hotu ne'ebe ruin ho ran naklekar husi rai ulun too rai ikun, husi tasi feto to'o tasi mane, sira hotu ne'ebe la iha biban hodi sente ukun rasik an.

Ita boot mak espellu ba sira hotu nia ilas hodi leno sidadaun hotu nia konxiensia oinsa servi ho integridade, servi ho honestidade, servi ho lealdade no liu-liu servi ho domin ba Timor. Legadu boot liu ita rai hela ba jerasaun foun maka nunka koko atu hariku-an, moris ho oituan ne'ebe iha, respeita ema hotu nia dignidade no haraik an mezmu hasoru laloran boot ambisaun no arrogánsia nian.

Ba ita hotu iha ne'e, Kompañeiru no Kamarada de Arma Lú nia despedida fó mensájen ba FALINTIL tomak, líderes partidu polítiku no kamada sosiedade hotu atu promove diálogu, unidade nasionál, no respeitu ba malu.

Despedida hafahe ita, maibé mos loke ita hotu nia fuan katak ema moris nudar vizitante iha mundu ne'e: ida-idak ho misaun, mai atu serví, mai atu observa, mai atu hadomi, no loron to'o fila hikas ba rai ne'ebe horik ita hotu. Maun Lú fila uluk, husu familia atu hamaran matan ben, orgullu ho misaun nobre no legadu ne'ebe nia husik hela ba timoroan tomak.

FALINTIL-FDTL agradese, rekoñese no valoriza ita boot. Ami promete sei tau matan ba Timor nia independénsia, Timor nia soberania, Timor nia ingreidade, nune'e mos sei tau matan ba família ne'ebe ita husik hela.

Adeus, Irmaun!

Adeus, Kamarada!

Adeus, Kompañeiru fiél husi jornada naruk!

Adeus, Patriota!

Adeus Oan Mane-Aswain Rai Timor-Lorosa'e.

Adeus!