Komunikadu Imprensa Kazu Rai Hera: Tribunál Fó Prazu Loron 30 Ba Rekerente Hatama Asaun Prinsipál

Dili, 31 Jullu 2026

Iha ámbitu julgamentu ba kazu providénsia kautelár ho Númeru Prosesu NUC 0275/26.CVTDD/2026 ne'ebé rekerente sira hatama hasoru Xefe Estadu-Maiór Jenerál Forsa Armada, Tenente Jenerál Falur Rate Laek, kona-ba disputa rai iha Hera, Postu Administrativu Cristo-Rei, Munisípiu Dili, Tribunál Judisiál Primeira Instánsia Dili hala'o ona audiénsia ohin.

Iha audiénsia ne'e, Advogadu Celestino Guterres husi Fundasaun Lia Los, ne'ebé akompaña husi Ekipa Seksaun Justisa no Relasaun Públika husi Kuartel-Jenerál F-FDTL iha Fatuhada, marka prezensa hodi defende interese husi Tenente Jenerál Falur Rate Laek.

Advogadu Celestino Guterres esplika, iha julgamentu ne'e Juiz Prezidente halo tentativa konsiliasaun hodi evita prejuizu ba parte rua iha futuru.

"Juiz fó despaxu katak rai ne'e sei mamuk hela, parte rua - tantu Autór no Réu - labele halo atividade ruma iha rai ne'e to'o desizaun finál. Tribunál mós fó prazu loron 30 ba parte rekerente atu hatama Asaun Prinsipál hodi kontinua prosesu ne'e. Sé mak manán no lakon, sei hatudu de'it iha Asaun Prinsipál nia desizaun finál," esplika Advogadu Guterres hafoin julgamentu.

Nia hatutan, bainhira rekerente hatama ona Asaun Prinsipál, parte husi Tenente Jenerál sei aprezenta kontestasaun tuir dalan legál, tanba prosesu sivíl sei lori tempu naruk.

Julgamentu ne'e prezide husi Juiz João Ribeiro no partisipa husi Advogadu sira husi parte rua, sasin sira, no reprezentante Seksaun Justisa no Relasaun Públika F-FDTL. Remata.

Ekipa Média F-FDTL